Mynd: UEFA.com

Lyon stóð í kvöld uppi sem sigurvegari í Meistaradeildar kvenna en leikið var á Ólympíuleikvanginum í Munchen. Þetta er annað árið í röð sem Lyon verður meistari.

Liðið lék úrslitaleik gegn Frankfurt og Camillie Abily og Eugénie Le Sommer sáu um að skora mörkin í leiknum, sem bæði komu í fyrri hálfleik. Lyon hefur eins og áður segir orðið meistari tvö ár í röð en hefur þó spilað úrslitaleikinn síðustu þrjú ár. Fyrir tveimur árum tapaði liðið gegn Turbine Potsdam í úrslitunum.

Mynd: Nordic Photos

Enska úrvasdeildarfélagið Liverpool virðist ætla að reyna að fá Roberto Martinez, stjóra Wigan, til félagsins til að leysa Kenny Dalglish af hólmi. Liverpool hefur fengið leyfi til að ræða við hinn 38 ára gamla Spánverja um að taka við liðinu en Wigan hefur ákveðið að leyfa Martinez að fara gegn greiðslu ef af verður. Martinez hefur náð góðum árangri með Wigan en eftir að flest stefndi í að liði myndi falla þá kom ótrúlegur lokasprettur þar sem liðið var óstöðvandi og liðið endaði í 15.sæti með 43 stig.

Liverpool hefur gefið út að nokkrir komi til greina sem stjóri hjá félaginu en þeir sem eru efst á blaði séu Martinez, Rafael Benitez og Jose Mourinho. Það eru ekki taldar neinar líkur á að Mourinho yfirgefi Real Madrid fyrir Liverpool, Benitez vill ólmur taka aftur við liðinu en Martinez er líklega sá stjóri sem verður ráðinn.

Mynd: ibvsport.is

Erlingur Richardsson, sem ásamt Kristni Guðmyndssyni stýrði HK til Íslandsmeistaratignar í handknattleik karla á nýafstaðinni leiktíð, hefur ráðið sig til starfa hjá ÍBV.  Erlingur er nýr yfirþjálfari ÍBV, þjálfar karlalið félagsins ásamt Arnari Péturssyni og veitir auk þess íþróttaakademíu ÍBV forstöðu.

Erlingur, sem er Eyjamaður í húð og hár, hefur þjálfað hjá HK undanfarin fimm ár; fyrstu þrjú árin stýrði hann kvennaliðinu og undanfarin tvö ár hefur hann þjálfað karlaliðið ásamt Kristni Guðmundssyni.  Erlingur verður eins og áður segir yfirþjálfari ÍBV og hefur yfirumsjón með þjálfun yngri flokka félagsins, þjálfar karlaliðið ásamt Arnari Péturssyni og verður forstöðumaður íþróttaakademíunnar sem ÍBV stendur fyrir í samstarfi við grunn- og framhaldsskóla Vestmannaeyja.

Mynd: Nordic Photos

Eins og Sport.is greindi frá í vikunni var Alex McLeish, stjóri Aston Villa, látinn taka pokann sinn eftir dapurt gengi á leiktíðinni. Nú keppast vefmiðlar að geta fyrir um hver taki við starfi hans og hafa tvö nöfn aðallega verið nefnd í því samhengi. Sá fyrri er Paul Lambert, stjóri Norwich og hinn síðari er Ole Gunnar Solskjær, Norðmaðurinn síbrosandi.

Solskjær, sem er aðeins 39 ára gamall, er tiltölulega nýfarinn í þjálfarabransann eftir sigursælan feril sem leikmaður. Hann þjálfaði varalið Manchester United í tvö ár og tók svo við uppeldisfélagi sínu, Molde, og gerði þá að norskum meisturum. Þrátt fyrir að Lambert og Solskjær séu efstir á óskalista Aston Villa hafa nöfn eins og Roberto Martinez, stjóri Wigan og Brendan Rodgers, stjóri Swansea einnig verið nefnd til sögunnar.

Aston Villa náði sögulegum lægðum í vetur og sigruðu til að mynda aðeins fjóra heimaleiki og náðu sér aðeins í 38 stig sem rétt dugði þeim til þess að spila í deild þeirra bestu á næstu leiktíð. Þetta var lægsti stigafjöldi sem Villa hefur fengið í 42 ár.

Mynd: Nordic Photos

Framherjinn knái í herbúðum Napoli, Edison Cavani, ætlar sér á Ólympíuleikana í sumar, sama hvað hver segir. Cavani, sem er 25 ára gamall, leikur fyrir hönd Úrúgvæ. Ekki er víst að forráðamenn Napoli séu sáttir við það að Cavani ætli sér að auka álagið á sér í sumar með því spila á leiknum en Cavani ætlar ekki að láta þá stoppa sig.

"Ég mun gera hvað sem er til þess að spila á Ólympíuleikunum, svo lengi sem að Tabarez [þjálfari Ólympíuliðs Úrúgvæ] velji mig." sagði Cavani og bætti við: "Ég mun fara til Ítalíu og valda usla, þá verða þeir að leyfa mér að fara á leikana". Cavani skoraði 23 mörk í ítölsku úrvalsdeildinni í vetur og er nú að undirbúa sig fyrir úrslitaleikinn í ítalska bikarnum sem fram fer um helgina þegar að Napoli og Juventus mætast.

Reglurnar á Ólympíuleiknum, sem fara fram í London í sumar, eru einfaldar: Þú mátt aðeins velja leikmenn 23 ára og yngri en það mega vera 2 leikmenn sem eru eldri en það í liðinu. Cavani er því að vonast eftir öðru af þessum tveimur sætum.

Mynd: Nordic Photos

Handboltasíðan Handball-planet.com greinir frá því í dag að Guðmundur Guðmundsson sé að öllum líkindum að hætta sem þjálfari Rhein Neckar Löwen í þýsku úrvalsdeildinni í lok tímabilsins. Síðan segir jafnframt að Velimir Petkovic, þjálfari Göppingen, muni taki við starfinu.

Guðmundur hefur stýrt Löwen undanfarin tvö ár samhliða því að þjálfa íslenska landsliðið. Liðið er í fimmta sæti deildarinnar og á ekki lengur möguleika á að komast í Meistaradeild Evrópu. Forráðamenn Löwen og Göppingen vildu ekki tjá sig um málið þegar að Handball Planet leitaði eftir því. Þá hefur heldur ekki náðst í Guðmund Guðmundsson við vinnslu þessarar fréttar og því ekkert staðfest í þessum efnum.

Mynd: Nordic Photos

Enski framherjinn, Michael Owen hefur spilað sinn síðasta leik fyrir Manchester United en félagið hefur ákveðið að bjóða honum ekki nýjan samning. Hann tilkynnti þetta á Twitter síðu sinni fyrr í dag.

Þrátt fyrir asð hafa verið lengi í boltanum er Owen einungis 32 ára gamall og ætlar sér að finna nýtt félag þegar hann hefur tekið sér stutt frí með fjölskyldunni. Hann hefur leikið með liðum á borð við Liverpool, Real Madrid og Newcastle auk þess sem hann lék með Manchester United. Í búningi Man. Utd skoraði hann 17 mörk í 52 leikjum.

"Stjórinn tilkynnti mér það á þriðjudag að ég myndi ekki fá nýjan samning. Ég hef elskað hverja einustu mínútu sem ég hef eytt síðustu þrjú ár hjá þessu liði," sagði Owen á Twitter.

Vignir mun samt ná seinustu tveimur leikjum liðsins, gegn Flensburg og N-Lübbecke .

Helgi Már eignaðist nýverið barn með Guðrúnu Sóleyju Gunnarsdóttir, fyrrum leikmanni KR í knattspyrnu, og hafa þau áhuga á að snúa til Íslands. KR-ingar eru að reyna að efla hópinn fyrir komandi átök en einhverjir leikmenn munu ekki leika áfram með liðinu á komandi tímabili.

Tekur Boas við Liverpool? Mynd: NordicPhotos

Eins og Sport.is greindi frá í gærdag er Kenny Dalglish hættur að þjálfa enska úrvalsdeildarfélagið Liverpool eftir tæplega eitt og hálft ár í starfi. Forráðamenn Liverpool sögðust ekki vera byrjaðir að íhuga eftirmann hans en fjölmiðlar voru fljótir að nefna fullt af nöfnum til sögunnar, þar efstan á blaði Roberto Martinez, stjóra Wigan.

Martinez er þó ekki eini maðurinn sem fjölmiðlar í Bretlandi hafa sagt líklegan til að taka við  Liverpool en til dæmis hefur Rafa Benitez verið orðaður við sinn gamla klúbb aftur og nú er nýtt nafn komið á borðið: Andre Villas-Boas, fyrrum stjóri Chelsea og Porto. Villas-Boas var látinn fara frá Chelsea í vetur eftir dapurt gengi og er hann nú atvinnulaus. Hann hefur það þó ekki slæmt en Chelsea þurfti að reiða háar fjárhæðir af hendi til þess að segja upp samningi hans. Nú hefur Villas-Boas toppað alla veðmálalista um hvaða maður tekur við Liverpool en mjótt er á mununum milli hans og Martinez eins og áður sagði.

Það verður fróðlegt að sjá hvað eigendur Liverpool gera í þessum efnum, en eigendur klúbbsins eru Fenway Sports Group.

David Clarkson fagnar marki sínu í gær Mynd: Nordic Photos

Í gær mættust erkifjendurnir, New York Rangers og New Jersey Devils, í annað sinn í úrslitarimmu austurdeildar í NHL deildinni. Rangers vann fyrsta leikinn sem fram fór á mánudaginn en í gær tókst Devils að jafna metinn í einvíginu, 1-1. Leikið var í Madison Square Garden, heimavelli Rangers.

Devils hófu leikinn af miklum krafti í gær og var fyrsti leikhluti þeirra eign. Þeim tókst þó aðeins að skora eitt mark og var það Ilya Kovalchuk sem gerði það, þegar að Devils voru einum fleiri. Þeir voru ansi nálægt því að bæta við fleiri mörkum í þessum leikhluta en tókst það þó ekki. Það er greinilegt að þjálfari Rangers, John Tortorella, hefur messað vel yfir sínum mönnum í leikhléi því eftir aðeins 11 mínútur í 2. leikhluta voru þeir komnir með 2-1 forystu og Devils heillum horfnir. Þeir rönkuðu þó við sér við þetta og jöfnuðu áður en þriðji leikhluti hófst. Þriðji og síðasti leikhlutinn var baráttuleikhluti þar sem menn lögðu allt í sölurnar. Það voru þó Devils sem höfðu betur í þessari baráttu því að David Clarkson skoraði eina mark leikhlutans og sigurmark Devils þegar hann stýrði skoti Adam Henrique framhjá Henrik Lundqvist í marki Rangers. Lokatölur 3-2 og staðan í einvíginu 1-1.

Í kvöld mætast svo Los AngelesKing og Phoenix Coyotes í þriðja sinn í þessari viku og geta Kings tekið 3-0 forystu í einvíginu með sigri. Leikurinn fer fram í Los Angeles.

Mynd: Nordic Photos

Í nótt náði Oklahoma City Thunder 2-0 forystu í einvíginu gegn Los Angeles Lakers. Liðin mættust í annað sinn á nokkrum dögum í undanúrslitum vesturdeildar og virðast Lakers ekki hafa nein svör gegn spræku liði Thunder. Thunder fór með tveggja stiga sigur að hólmi í gær, 77-75.

Lakers leiddu bróðurpartinn af leiknum í gær og voru Thunder alltaf skrefi á eftir. Þegar rúm mínúta var til leiksloka höfðu Lakers 5 stiga forystu, 75-70 en þá var dagskrá þeirra lokið. Á þessari mínútu skoruðu leikmenn Thunder 7 stig en Lakers ekki neitt. Það var að lokum Kevin Durant sem tryggði Thunder sigurinn af vítalínunni. Hann skoraði 22 stig í leiknum og Russell Westbrook skoraði 15. Hjá Lakers voru þeir Kobe Bryant og Andrew Bynum stigahæstir með 20 stig hvor.

Þá tóku Boston Celtics forystuna á nýjan leik í seríunni gegn Philadelphia 76ers, 2-1. Leikurinn í gær fór fram á heimavelli 76ers en skipti það leikmenn Boston engu máli sem léku prýðisvel. Sixers hófu þó leikinn betur en eftir 5 mínútur voru Celtics komnir með forystu sem þeir létu aldrei af hendi. Þeir unnu að lokum 16 stiga sigur, 107-91. Vörn þeirra var frábær og sýndu Kevin Garnett og Paul Pierce frábæra takta í sóknarleiknum. Garnett skoraði 27 stig og tók 13 fráköst og Pierce skoraði 24 stig og tók 12 fráköst. Hjá Sixers var Thaddeus Young stigahæstur með 22 stig.

Úrslit gærkvöldsins:

Oklahoma City Thunder 77-75 LA Lakers
Philadelphia 76ers 91-107 Boston Celtics

Mynd: Nordic Photos

Úrvalsdeildarfélögin Gummersbach og Grosswallstadt eru í vandræðum fyrir næsta tímabil í þýsku deildinni en þeim hefur gengið illa að fá leyfið sitt framlengt til þess að taka þátt. Eins og í flestum íþróttum í heiminum þurfa ákveðnir hlutir að vera í lagi, þar með talinn keppnishöllin, umgjörð og fleira. Þetta er víst í ólagi hjá bæði Gummersbach og Grosswallstadt.

Bæði liðin hafa fengið frest til 31. maí að klára sín mál og koma öllu í stand. Ef það tekst ekki, munu þessi tvö lið ekki hafa keppnisleyfi á næsta ári í deild þeirra bestu í Þýskalandi. Gummersbach er í 10. sæti deildarinnar sem stendur en Grosswallstadt er í 14. sæti.

Mynd: NordicPhotos

Liverpool rak í dag þjálfara sinn, Skotann Kenny Dalglish, sem stýrt haði liðinu síðan í janúar í fyrra. Liðið olli miklum vonbrigðum í deildinni en undir stjórn Dalglish vann liðið þó sinn fyrsta bikar í sex ár þegar að Liverpool sigraði deildarbikarinn. Eigendur Liverpool töldu að breytinga væri þörf og létu Dalglish fara. Á heimasíðu Liverpool er viðtal við kappann þar sem hann segjast skilja sáttur við félagið.

"Það var heiður og forréttindi að fá tækifæri til þess að snúa aftur og stýra Liverpool. Ég kann að meta þá vinnu sem allir sem að félaginu koma lögðu á sig fyrir félagið á þeim tíma sem ég var þarna. Auðvitað var lokaniðurstaðan í deildinni vonbrigði en við náum samt að skila titil í hús í fyrsta sinn á 6 árum," sagði Dalglish.

"Auðvitað finnst mér leiðinlegt að skilja við félagið á þessum tímapunkti en að uppsögn minni var samt staðið á heiðarlegan og virðingarlegan hátt. Það sýnir gæðin í þeim sem stjórna félaginu. Þegar ég tók við sagði ég að ég myndi alltaf gera allt sem ég gæti til þess að hjálpa liðinu og það stendur enn. Að lokum við ég þakka stuðningsmönnum liðsins. Án þeirra efðum við ekki afrekað neitt," sagði Dalglish að lokum.

Mynd: Nordic Photos

BBC-fréttastofan staðfesti nú fyrir stundu að Kenny Dalglish, sem stýrt hefur enska úrvalsdeildarliðinu Liverpool síðan í janúar í fyrra, hefði látið af störfum.  Brotthvarf hans kemur í raun ekki mjög á óvart, orðrómur um stjóraskipti á Anfield hefur svifið yfir vötnum um nokkur skeið þar sem hvorki eigendur né stuðningsmenn Liverpool sættu sig við árangurinn á nýafstaðinni leiktíð.

Dalglish er einn dáðasti sonur Liverpool, einn besti leikmaðurinn í sögu félagsins og stjóri þess í tvígang.  Hann hóf stjóraferilinn hjá Liverpool árið 1985 og stýrði félaginu um sex ára skeið, gerði Blackburn að Englandsmeisturum árið 1995 og spreytti sig í kjölfarið hjá bæði Newcastle og Celtic.  Dalglish settist aftur í stjórastólinn hjá Liverpool í janúar í fyrra, tók þá við keflinu af Roy Hodgson sem einmitt var ráðinn fyrir tilstuðlan Dalglish, en árangurinn í úrvalsdeildinni hefur látið á sér standa þrátt fyrir talsverð fjárútlát.  Liverpool vann deildabikarinn á nýafstaðinni leiktíð, fyrsta bikarinn sem félagið vinnur í sex ár, og komst aukinheldur í úrslit bikarkeppninnar en mátti þar sætta sig við tap gegn Chelsea.

Orðrómur um brotthvarf Dalglish hefur verið býsna þrálátur undanfarnar vikur og endanleg ákvörðun um stjóraskipti var tekin í kjölfar fundar Dalglish og meirihlutaeigendanna John W. Henry og Tom Werner í Boston á mánudag.

Fulltrúar fimm fjölmiðla; 365, RÚV, 433.is, Fótbolta.net og Morgunblaðsins (mbl.is) tippa á úrslit leikja í Pepsi-deild karla og stigagjöfin er einföld.  Fyrir rétt úrslit leiks, þ.e.a.s sigur annars liðsins eða jafntefli, er gefið 1 stig, fyrir rétta markatölu fást 3 stig og gerist einhver svo forsjáll að sjá fyrir markahrók sem skorar þrennu eru gefin 5 stig.

Elvar Geir Magnússon - Fótbolti.net

Adolf Ingi Erlingsson – RÚV

Víðir Sigurðsson – Morgunblaðið

Kolbeinn Tumi Daðason - 365

Hörður Snævar Jónsson – 433.is

Staðan eftir þrjár umferðir:

Mynd: Hilmar Þór

Rúnar Sigtryggsson, fyrrverandi landsliðsmaður og atvinnumaður í handknattleik og þjálfari Akureyrar, hefur verið ráðinn þjálfari þýska annarrardeildarliðsins EHV Aue.  Rúnar samdi við þýska liðið til tveggja ára.  Sveinbjörn Pétursson, sem varið hefur mark Akureyrar undanfarin tvö ár, leikur einmitt með Aue á komandi leiktíð.

„Ég nálgast þetta svolítið sem spennandi ævintýri,“ sagði Rúnar í stuttu spjalli við Sport.is í dag.  „Það kitlar að fara að þjálfa aftur, ég tala nú ekki um akkúrat þarna í Mekka handboltans.“  Rúnar stýrði liði Akureyar í N1-deild karla með ágætum árangri fyrir þremur árum og þjálfaði Eisenach í Þýskalandi tímabilið 2004-2005.  Rúnar er uppalinn Þórsari, lék með Val, Víkingi og Haukum hér heima og Wallau Masseheim, Eisenach og Göppingen í Þýskalandi.  Þá varð hann Evrópumeistari með Ciudad Real á sínum tíma.

„Þetta kom eiginlega upp á yfirborðið í febrúar, þá höfðu forráðamenn Aue fyrst samband við mig og það má eiginlega segja að hlutirnir hafi komist á hreyfingu strax í mars.  Þetta var svolítið bundið við það hvernig liðinu myndi vegna, hvort það kæmust upp í 2.deild.  Þetta gekk allt saman tiltölulega hratt fyrir sig.  Ég veit þannig lagað að hverju ég geng, þekki ágætlega til í Þýskalandi og þetta er spennandi tækifæri.  Umgjörðin þarna úti er önnur og betri en við eigum að venjast hér heima, en pressan er líka meiri.“

„Liðið er að koma upp úr þriðju deildinni og þetta verður mikil áskorun,“ segir Rúnar þegar hann er beðinn um að rýna í næstu leiktíð.  „Leikmannahópurinn er tiltölulega ungur, elsti maðurinn er 34 ára en stærstur hluti hópsins er í kringum 25 ára aldurinn.  Hópurinn fyrir næstu leiktíð er klár, það koma þrír nýir leikmenn til liðsins og Bubbi (Sveinbjörn Pétursson) er einn þeirra.  Mér líst vel á að fá hann til liðsins, ég er búinn að þekkja hann síðan hann var sextán ára og veit hvað hann kann og hvað hann getur.“

Mynd: Snorri Sturluson

Ágúst Jóhannsson, landsliðsþjálfari kvenna í handknattleik, hefur gert breytingu á leikmannahópi sínum fyrir tvo síðustu leiki íslenska liðsins í undankeppni EM 2012.  Ragnhildur Rósa Guðmundsdóttir úr Val dró sig út úr hópnum vegna meiðsla og Sunna Jónsdóttir úr Fram kemur inn í hópinn í hennar stað.

Ísland leikur tvo síðustu leiki sína í undankeppni EM sitt hvoru megin við næstu mánaðamót, mætir Spáni í Vodafonehöllinni þann 30.maí og Úkraínu ytra þann 3.júní.  Íslenska liðið situr sem stendur í þriðja sæti sjöunda undanriðils með 4 stig eftir fjóra leiki, tapaði fyrir Spáni ytra og Úkraínu hér heima en vann báða leiki sína gegn Sviss.  Spánn og Úkraína sitja í tveimur efstu sætunum með 6 stig.

Landsliðshópurinn er eftirfarandi:

Mynd: Nordic Photos

Alan Smith, fyrrum leikmaður Leeds United og Manchester United, fékk heldur betur óblíðar móttökur eftir leik MK Dons og Huddersfield í umspili um laust sæti í 1. deildinni á Englandi í haust. Smith er lánsmaður hjá MK Dons en hann er samningsbundinn Newcastle.

Huddersfield vann leikinn 3-2 og hlupu áhagendur liðsins inn á völlinn eftir leik til þess að fagna. Sumir þeirra voru þó ekki bara að fagna heldur réðust þeir að Alan Smith, sem mátti sín lítið gegn fjöldanum. Hann reyndi þó að verja sig en fékk heldur betur óblíðar móttökur. Þurfti lögreglan að grípa í taumana, ásamt forráðamönnum Huddersfield til þess að koma Smith í skjól. Hann slapp þó tiltölulega ómeiddur frá atvikinu.

Mynd: NordicPhotos

Roy Hodgson, nýráðinn landsliðsþjálfari Englendinga, hefur valið 23 manna leikmannahópinn sem fer á Evrópumótið í Póllandi og Úkraínu í sumar. Rio Ferdinand, miðvörður Manchester United, er ekki í leikmannahópnum en taugaspenna hefur verið milli hans og John Terry eftir að sá síðarnefndi var ásakaður um kynþáttaníð í garð Anton Ferdinand. Þá tilkynnti Hodgson einnig að Steven Gerrard yrði fyrirliði liðsins á mótinu.

Wayne Rooney er í hópnum þrátt fyrir að vera í leikbanni í fyrstu tveimur leikjum liðsins í riðlakeppninni eftir að hafa verið rekinn af velli í leik gegn Svartfellingum í undankeppninni. Athygli margra vekur að Stuart Downing, leikmaður Liverpool, er í leikmannahópnum en hann náði sér engan veginn á strik í vetur og þá er ekkert pláss í hópnum fyrir Michael Carrick. Scott Parker, miðjumaður Tottenham, er í hópnum þrátt fyrir að enn sé óljóst hvort hann geti tekið þátt í mótinu vegna meiðsla sem hann varð fyrir í ensku úrvalsdeildinni á dögunum.

Alex Oxlade-Chamberlain, sem vakið hefur talsverða athygli með Arsenal í vetur, fer á sitt fyrsta stórmót en hann hefur gert það gott með U21 árs landsliðinu undanfarið en hann skoraði m.a þrennu í leik gegn Íslendingum á Laugardalsvelli í haust. Hodgson velur þekktar stærðir í markmannsstöðurnar og ert klárt mál að Joe Hart mun hefja leiki í marki enskra. Öllu meiri athygli vekur þó að John Ruddy, markvörður Norwich, fær verðskuldað pláss í hópnum en hann stóð sig vel með Norwich í vetur.

Markverðir: Joe Hart (Man City), Robert Green (West Ham), John Ruddy (Norwich)

Varnarmenn: Glen Johnson (Liverpool), Phil Jones (Man United), John Terry (Chelsea), Joleon Lescott (Man City), Gary Cahill (Chelsea), Ashley Cole (Chelsea), Leighton Baines (Everton)

Miðjumenn: Theo Walcott (Arsenal), Stewart Downing (Liverpool), Alex Oxlade-Chamberlain (Arsenal), Steven Gerrard (Liverpool), Gareth Barry (Man City), Frank Lampard (Chelsea), Scott Parker (Tottenham), Ashley Young (Man United), James Milner (Man City)

Framherjar: Wayne Rooney (Man United), Danny Welbeck (Man United), Andy Carroll (Liverpool), Jermain Defoe (Tottenham)

Mynd: Nordic Photos

Los Angeles Kings og Phoenix Coyotes mættust í annað sinn á þremur dögum í úrslitarimmu vesturdeildarinnar í NHL deildinni. Kings, sem hófu einvígið á útivelli, leiddu 1-0  fyrir leikinn í gær. Leikið var á heimavelli Coyotes og var aldrei spurning um sigurvegarann í þeim leiknum. Kings unnu 4-0 og hafa þar með ekki enn tapað leik á útivelli í úrslitakeppninni þetta árið.

Dwight King kom gestunum yfir snemma leiks og þeir litu aldrei við eftir það. Þeir leiddu 3-0 eftir tvo leikhluta og skoruðu svo fjórða markið um miðbik síðasta leikhlutans. Jonathan Quick í marki Kings var frábær, sem fyrr, en hann hélt markinu hreinu. Nú ferðast liðin til Los Angeles þar sem þau munu mætast í þriðja sinn á morgun. Öskubuskuævintrýri Kings, sem rétt sluppu inn í úrslitakeppnina, virðist engan endi ætla að taka.

Í kvöld mætast síðan New York Rangers og New Jersey Devils í annað sinn, aftur á heimavelli Rangers, Madison Square Garden. Rangers leiða einvígið 1-0 en þeir höfðu betur en Devils í fyrsta leik liðanna. Leikurinn hefst á miðnætt í kvöld og verður í beinni sjónvarpsútsendingu á ESPN America.

Mynd: Hilmar Þór

Ákveðið hefur verið að koma á fót verkefni á vegum KSÍ þar sem trúnaðarmenn eru ráðnir til landshlutanna.  Miðar verkefnið að því að auka samskipti og samráð við þjálfara aðildarfélaga, færa þjónustu nær aðildarfélögum, meta efnilega leikmenn og fylgja eftir efnilegum leikmönnum í samráði við félögin.  Nú hefur Atli Eðvaldsson verið ráðinn sem trúnaðarmaður höfuðborgarsvæðisins.

Atli er öllum knattspyrnuáhugamönnum vel kunnur en hann hefur síðustu misseri verið í Þýskalandi þar sem hann fékk UEFA Pro þjálfararéttindi.   Áður höfðu Pétur Ólafsson verið ráðinn fyrir Norðurland og Eysteinn Húni Hauksson fyrir Austurland.  Eyjólfur Sverrisson mun hafa yfirumsjón með verkefninu.

Spilar Kagawa með United næstu leiktíð? Mynd: NordicPhotos

Japanski knattspyrnumaðurinn Shinji Kagawa, leikmaður Þýskalandsmeistara Borussia Dortmund, hitti Sir Alex Ferguson, knattspyrnustjóra enska úrvalsdeildarliðsins Manchester United, á dögunum í Manchester borg og fundaði með honum. Kagawa hefur verið sterklega orðaður við United að undanförnu og hafnaði nýverið nýjum samningi hjá Dortmund. Hann segist ætla að skoða stöðu sína vel áður en ákvörðun verður tekin.

„Það var mjög gott að hitta Ferguson í eigin persónu og tala við hann. Ég vil hins vegar taka mér góðan tíma í að taka næsta skref,“ sagði Kagawa og bætti við að Ferguson hefði sagt margt jákvætt á fundinum, en fór ekki nánar út í þá sálma.

Ferguson fylgdist með úrslitaleik Bayern Munchen og Borussia Dortmun um þýska bikarmeistaratitilinn á dögunum þar sem Kagawa skoraði í 5-2 sigri Dortmund. Ferguson er einnig sagður fylgjast vel með framherjanum Robert Lewandowski, samherja Kagawa hjá Dortmund.

Það er Retina-skjár á iPad

Það eru komnar allskonar pælingar um hvaða kostum nýja MacBook Pro og iMac frá Apple verða gæddar. Það sem ber hæst eru sögusagnir um að Retina-skjáir verði staðalbúnaður sem og verði ekkert geisladrif í vélunum, þær allar nettari og komnar með SSD-drif í stað venjulegs harðs disks. En ætli Apple sér að skella Retina-skjá í þessi tæki þá þarf Apple einnig að finna leið til að láta rafhlöðuna ekki klárast á stuttum tíma.

Retina-skjáirnir hafa þann ókost að þeir eyða mikilli orku og hitna meira en gengur og gerist. Það þýðir að mesta aflið úr vinnslugetu tölvunnar fer í að keyra skjáinn. Apple er líklega að finna lausnir á þessu en talað er um að glænýjar skjástýringar verði í vélunum sem minnki rafhlöðunotkun til muna.

Þá er talað um að vélarnar komi með SSD-diskum sem er tímabært enda minnkar orkunotkunin með SSD-diskum sem myndi hjálpa til með endinguna á hverri rafhlöðuhleðslu. Það er varla frétt að geisladrifin eru að úreltast og segir sagan að Apple ætli að spara pláss í vélunum með því að sleppa geisladrifum, eins og gert hefur verið með MacBook Air.

HTC C

HTC hefur formlega svipt hulunni af HTC Desire C. Talsvert magn af upplýsingum hafði lekið út á Netið um þennan ágæta síma og er í raun lítið annað við það að bæta þar sem þær fregnir virðast hafa allar verið réttar.

HTC hefur staðfest að þetta verður ódýr Android 4.0-sími og að hann verði fáanlegur í rauðum, hvítum og svörtum lit. Að auki bætist það við að HTC Desire C verður með Beats Audio-stuðningi. HTC stefnir að því að setja HTC Desire C í sölu í upphafi næsta mánaðar.

Steve Ballmer

Forbes-tímaritið í Bandaríkjunum hefur valið Steve Ballmer, forstjóra Microsoft, sem versta forstjóra stórfyrirtækis í Bandaríkjunum. Nokkrir forstjórar sitja á þessum lista hjá stórfyrirtækjum á borð við Cisco, General Electric, Walmart og fleirum en Forbes telur að Ballmer eigi það fyllilega skilið að sitja á toppnum á þessum vafasama lista.

Ástæðan fyrir því að Forbes setur hann í efsta sætið yfir verstu forstjórana í Bandaríkjunum er vegna þess að á meðan tækniheimurinn hefur verið að þróast á ljóshraða undanfarin ár þá hefur Microsoft verið of seint eða á engan hátt haldið í við þær nýjungar sem eru að eiga sér stað á markaðnum.

Er það mat Forbes að innkoma Microsoft á snjallsíma- og spjaldtölvumarkaðinn sé það sein að það hafi orðið til þess að Microsoft hefur ekki verið þátttakandi að neinu ráði á þessum markaði sem hefur orðið til þess að koma niður á tekjum og hagnaði fyrirtækisins, sem hefur að sama skapi komið niður á samstarfsaðilum Microsoft eins og Dell, HP og Nokia.

Þegar Ballmer tók við Microsoft af Bill Gates fyrir rúmum áratug síðan stóðu hlutabréf fyrirtækisins í 60 dollurum á hlut. Á innan við 2 árum fór hlutabréfaverðið niður fyrir 30 dollara markið en hefur upp á síðkastið náð aftur upp fyrir 30 dollara.

Skoðun Forbes er sú að stjórn Microsoft væri betur borgið ef Ballmer væri ekki við stjórnvölinn. Það er því hreinlega spurning hvort að Ballmer eigi því ekki allt undir því komið að Windows 8 og Windows Phone 8 slái í gegn en fram að þessu hefur það verið mat tæknigeirans að svo muni verða.

Mynd: Hilmar Þór

Enginn kostunaraðili er á bikarkeppni KSí í ár. Valitor hefur verið kostunaraðili undanfarin ár en rétturinn af bikarnum var seldur til 365-miðla fyrir tímabilið og því geta 365-miðlar kallað bikarkeppnina 365-bikarinn eða Stöð 2 Sport bikarkeppnina. Það sem kannski flækir málin eitthvað er staðreyndin að 365-miðlar eru einnig með sýningarréttinn og því myndi fyrirtækið sýna í beinni Stöð 2 Sport bikarinn á Stöð 2 Sport.

Útsendingaréttarfyrirtækið Sport Five seldi 365-miðlum heildapakka af íslenska boltanum í ár og í honum eru réttindi sem viðkoma efstu deildum karla og kvenna, bikarkeppninni og landsleikjum. Það er því í höndum 365-miðla að nefna bikarinn ef fyrirtækið á annað borð hefur áhuga á því. Þangað til mun bikarkeppnin kallast Bikarkeppni KSÍ.

Það eru áratugir síðan bikarkeppnin bar ekki nafn kostanda en árið 1986 byrjaði bikarkeppnin að kallast Mjólkurbikarinn, það eru því 27 ár síðan bikarkeppnin bar ekki nafn kostenda.

Mynd: Nordic Photos

Enskir fjölmiðlar greina frá því í dag að Roy Hodgson, þjálfari enska landsliðsins í knattspyrnu, ætli að skilja Rio Ferdinand varnarmann Manchester United eftir er hann tilkynnir lokahópinn fyrir Evrópumótið í dag. Hodgson er sagður hafa hitt Ferdinand á dögunum og sagt honum frá ákvörðun sinni. Ferdinand er 33 ára og hefur glímt við bakmeiðsli í vetur og þá hefur samband Ferdinands og John Terry fyrirliða Chelsea verið stirt, en þeir hafa verið samherjar hjá landsliðinu.

Hogdson er sagður ætla að velja Terry í hópinn og talið of mikla áhættu á að velja þá báða. Forsaga málsins er sú að Terry hefur verið ásakaður um kynþáttaníð gagnvart Anton Ferdinand, leikmanni QPR og bróðir Rio, en málið verður tekið fyrir í dómstólum í júlí í sumar.

Evrópumótið hefst í næsta mánuði og er haldið í Póllandi og Úkraínu.

Mynd: Nordic Photos.

Indiana Pacers gerði sér lítið fyrir og skellti Miami Heat, 78-75, á útivelli í nótt í öðrum leik liðanna í undanúrslitum Austurdeildarinnar í NBA-deildinni í körfuknattleik. Staðan í einvíginu er því 1-1. Einnig áttust við í nótt San Antonio Spurs og Los Angeles Clippers í fyrsta leik liðanna í undanúrslitum Vesturdeildarinnar þar sem San Antonio sigraði, 108-92.

LeBron James skoraði 28 stig fyrir Miami Heat og Dwyane Wade 24 stig, en liðið saknaði sárlega Chris Bosh sem lék ekki vegna meiðsla. David West skoraði sextán stig fyrir Pacers og George Hill skoraði fimmtán stig.

San Antonio var skrefinu framar nánast allan leikinn gegn Clippers. Tim Duncan skoraði 26 stig fyrir Spurs og tók tíu fráköst og Manu Ginobili skoraði 22 stig. Hjá Clippers var Eric Bledsoe stigahæstur með 23 stig. Spurs hefur 1-0 yfir í einvíginu.

Kjartan Henry skoraði þrennu fyrir KR í kvöld

Fimm leikir voru á dagskrá í Pepsi-deild karla í knattspyrnu í kvöld. KR-ingar unnu tæpan 3-2 sigur á ÍBV í Frostaskjólinu, Skagamenn unnu 1-0 í Árbænum, Framrar unnu ótrúlegan 4-3 sigur á Grindvíkingum, Breiðablik vann Val 1-0 í bragðdaufum leik og að lokum unnu FH-ingar 1-0 sigur á Selfossi. Hér að neðan birtast viðtöl við leikmenn og þjálfara liðanna.

Fylkir 0-1 ÍA | Ásmundur Arnarsson | Fylkir

Fylkir 0-1 ÍA | Þórður Þórðarson | ÍA

Fram 4-3 Grindavík | Þorvaldur Örlygsson | Fram

Fram 4-3 Grindavík | Guðjón Þórðarson | Grindavík

KR 3-2 ÍBV | Rúnar Kristinsson | KR 

KR 3-2 ÍBV | Magnús Gylfason | ÍBV 

KR 3-2 ÍBV | Kjartan Henry Finnbogason | KR

Breiðablik 1-0 Valur | Kristján Guðmundsson | Valur

Breiðablik 1-0 Valur | Ólafur Kristjánsson | Breiðablik

Breiðablik 1-0 Valur | Haukur Páll Sigurðsson | Valur

Mynd: Eyjólfur Garðarsson

Þriðju umferð Pepsi-deildar karla í knattspyrnu lauk í kvöld, en þá voru fimm leikir á dagskrá.  Skagamenn hafa enn fullt hús stiga eftir sigur á Fylki, KR vann torsóttan sigur á ÍBV, Framarar hrukku í gang og skoruðu fjögur mörk í Laugardalnum, FH-ingar unnu Selfyssinga og Blikar lönduðu sínum fyrsta sigri á leiktíðinni þegar Valsmenn komu í heimsókn í Kópavoginn.  Hér má finna umfjöllun um leiki kvöldsins.

Fram 4-3 Grindavík (0-2)
0-1 Tomi Ameobi 19.mín.
0-2 Pape Mamadou Faye 44.mín.
1-2 Almarr Ormarsson 48.mín.
1-3 Mikael Eklund 54.mín.
2-3 Ásgeir Gunnar Ásgeirsson 57.mín.
3-3 Kristinn Ingi Halldórsson 75.mín.
4-3 Steven Lennon 90.mín

Fyrstu tuttugu mínúturnar í viðureign Fram og Grindavíkur voru heldur tíðindalausar en Framarar voru þó ögn frískari. Guðjón Þórðarsson, þjálfari Grindvíkinga var greinilega búinn að kortleggja Framliðið vel og lágu Grindvíkingar þéttir til baka. Þeir áttu þó sínar sóknir líka og eins lík bar árangur á 20. mínútu þegar að gestirnir úr Grindavík náðu forystunni. Þá skoraði Tomi Ameobi af stuttu færi eftir aukaspyrnu frá Luic Ondo. Eftir þetta gerðist fátt markvert þangað til Grindavík náði að tvöfalda forystu sína undir lok fyrri hálfleiks. Aftur var marki með skoti af stuttu færi en í þetta sinn var það Pape Mamdou Faye sem sá um að skora. Fyrstu 20. mínútur síðari hálfleiks voru síðan af dýrari gerðinni. Fljótlega eftir að hálfleikurinn hófst náði Almarr Ormarsson að minnka muninn fyrir Framara eftir laglegt samspil við Sam Tillen. Fimm mínútum síðar náði Grindavík að skora aftur þegar að Mikael Eklund skallaði hæst eftir horn og stangaði boltann í netið. Mikael var að spila sinn fyrsta leik með liðinu. Hasarinn var ekki búinn því einungis tveimur mínútum eftir þriðja mark gestanna misstu þeir mann af velli þegar Alexander Magnússon fékk sitt annað gula spjald á skömmum tíma og þar með rautt. Fram fékk í kjölfarið aukaspyrnu og eftir hana skoraði Ásgeir Gunnar Ásgeirsson fyrir Fram eftir klafs í teignum. Framarar náðu svo að jafna leikinn stundarfjórðungi fyrir leikslok þegar Kristinn Ingi Halldórsson skoraði með þrumufleyg af rúmlega 25 metr færi. Framarar reyndu hvað þeir gátu að knýja fram sigur og sókn þeirra bar árangur á 90. mínútu þegar Steven Lennon skoraði frábært mark eftir þunga sókn Framara. Það reyndist seinasta mark leiksins og Framarar unnu því að lokum dramatískan sigur, 4-3 í stórskemmtilegum knattspyrnuleik.

Fram: Ögmundur Kristinsson – Almarr Ormarsson, Kristján Hauksson, Alan Lowing, Sam Tillen (gult 79.mín.), Halldór Hermann Jónsson, Ásgeir Gunnar Ásgeirsson, Samuel Hewson, Kristinn Ingi Halldórsson, Steven Lennon(gult spjald 90.mín), Hólmbert Aron Friðjónsson.
Varamenn: Denis Cardaklija, Daði Guðmundsson, Jón Gunnar Eysteinsson, Orri Gunnarsson, Sveinbjörn Jónasson, Gunnar Oddgeir Birgisson, Stefán Birgir Jóhannesson.
Gul spjöld: Sam Tillen 79.mín, Steven Lennon 90.mín.

Grindavík: Óskar Pétursson – Ray Anthony Jónsson, Loic Ondo, Ólafur Örn Bjarnason, Jósef Kristinn Jósefsson, Mikael Eklund, Scott Ramsay, Óli Baldur Bjarnason, Alexander Magnússon( gult 49.mín. rautt 56.mín.), Tomi Ameobi, Pape Mamadou Faye. (gult 62.mín.)
Varamenn: Benóný Þórhallsson, Alex Freyr Hilmarsson, Páll Guðmundsson, Gavin Morrison, Björn Berg Bryde, Marko Valdimar Stefánsson, Jordan Edridge.
Gul spjöld: Alexander Magnússon 51.mín., Pape Mamadou Faye (2) 62.mín.
Rautt spjald: Alexander Magnússon 56.mín.

———

Fylkir 0 – 1 ÍA (0-0)
0-1 Ólafur Valur Valdimarsson 77.mín

Fyrri hálfleikur í leik Fylkismanna og Skagamanna fer seint í sögubækurnar fyrir að bjóða upp á mörg marktækifæri eða mikinn hasar. Þeir gulklæddu áttu nokkur skot að marki af löngu færi snemma leiks án þess þó að skapa mikla hættu. Jóhann Þórhallsson, sem hóf leik í framlínu Fylkismanna, þurfti að fara af velli á 30.mínútu leiksins vegna meiðsla en hann haltraði eftir skot sem hann átti skömmu áður. Staðan markalaus í hálfleik í ákaflega bragðdaufum leik. Páll Gísli Jónsson, markvörður Skagamanna, þurfti að fara af velli snemma í síðari hálfleik vegna meiðsla og kom Árni Snær Ólafsson inn á í hans stað. Það dró loksins til tíðinda á 66.mínútu þegar heimamenn fengu dæmda vítaspyrnu þegar Árni Freyr Guðnason var felldur inni í teignum. Ingimundur Níels Óskarsson steig á punktinn en Árni Snær, sem hafði komið inn á sem varamarkvörður, varði spyrnu hans glæsilega. Þrettán mínútunum fyrir leikslok kom loksins mark í leikinn þegar varamaðurinn Ólafur Valur Valdimarsson skoraði með skalla fyrir Skagamenn þegar boltinn hafði borist til hans á fjærstöng eftir skot Andra Adolphssonar. Mörkin urðu ekki fleiri í leiknum og Skagamenn fóru með öll þrjú stigin heima á Akranes en þeir hafa nú fullt hús stiga eftir þrjár umferðir í deildinni.

Fylkir: Bjarni Þórður Halldórsson; Kristján Valdimarsson (Hjörtur Hermannsson 56.mín), Ásgeir Börkur Ásgeirsson, Davíð Þór Ásbjörnsson, Ingimundur Níel Óskarsson, Jóhann Þórhallsson (Árni Freyr Guðnason 30.mín), Kjartan Ágúst Breiðdal, Magnús Þórir Matthíasson, Tómas Þorsteinsson (Finnur Ólafsson 80.mín), David Elebert, Andri Þór Jónsson
Varamenn: Finnur Ólafsson, Árni Freyr Guðnason, Ásgeir Örn Arnþórsson, Oddur Ingi Guðmundsson, Ásgeir Eyþórsson, Hjörtur Hermannsson, Kristján Finnbogason.
Gult spjald: Ásgeir Börkur Ásgeirsson 45.mín.

ÍA: Páll Gísli Jónsson (Árni Snær Ólafsson 53.mín); Aron Ýmir Pétursson, Kári Ársælsson, Ármann Smári Björnsson, Gary Martin, Jóhannes Karl Guðjónsson, Garðar Gunnlaugsson (ÓIafur Valur Valdimarsson 62.mín), Jón Vilhelm Ákason (Andri Adolphsson 66.mín), Arnar Már Guðjónsson, Mark Doninger, Einar Logi Einarsson.
Varamenn: Árni Snær Ólafsson, Ólafur Valur Valdimarsson, Guðmundur Böðvar Guðjónsson, Andri Adolphsson, Eggert Kári Karlsson, Dean Martin, Andri Geir Alexandersson.
Gul spjöld: Aron Ýmir Pétursson 48.mín, Kári Ársælsson 66.mín.

———-

Breiðablik 1- 0  Valur (0-0)
1-0 Elfar Árni Aðalsteinsson 59.mín.

Fyrri hálfleikur í Kópavoginum var eign Breiðabliks. Haukur Baldvinsson komst næst því að skora eftir fallegan sprett inn í teig Vals en Sindri Jensson sá við honum. Markalaust var í hléi. Elfar Árni Aðalsteinsson skoraði með skalla á 59.mínútu og kom Breiðabliki yfir. Sóknarspil Vals var afar dapurt í leiknum og það var líkt og liðið kynni ekki þá hlið knattspyrnunar, ótrúleg sjón í efstu deild. Leiknum lauk með sigri Breiðabliks gegn arfaslöku Valsliði. Leikur sem heild olli miklum vonbrigðum og verða bæði lið að gera betur til að vera í efri hluta deildarinnar.

Breiðablik: Sigmar Sigurðsson – Þórður Hreiðarsson, Rene Troost, Árni Vilhjálmsson, Kristinn Jónsson – Finnur Margeirsson, Jökull Elísabetarson, Sverrir Ingason, Tómas Garðarsson – Haukur Baldvinsson ( Olgeir Sigurgeirsson 84.mín), Elfar Aðalsteinsson.
Varamenn: Ingvar Kale, Sindri Magnússon, Rafn Haraldsson, Olgeir Sigurgeirsson, Arnar Björgvinsson, Petar Rnkovic, Stefán Pálsson.
Gul spjöld: Þórður Steinar Hreiðarsson (2) 69.mín., Haukur Baldvinsson (2) 76.mín.

Valur:  Sindri Jensson – Brynjar Kristmundsson, Atli Sveinn Þórarinsson, Halldór Halldórsson, Matarr Jobe – Rúnar Sigurjónsson, Guðjón Lýðsson, Andri Stefánsson(Haukur Sigurðsson 45.mín.) – Matthías Guðmundsson, Atli Heimisson (Kolbeinn Kárason 45.mín.), Kristinn Freyr Sigurðsson (Ásgeir Ingólfsson 73.mín.)
Varamenn:  Ásgeir Magnússon, Úlfar Pálsson, Hafsteinn Briem, Haukur Sigurðsson, Hörður Sveinsson, Kolbeinn Kárason, Ásgeir Ingólfsson
Gul spjöld: Halldór Kristinn Halldórsson (2) 66.mín., Kolbeinn Kárason 90.mín.

———-

Selfoss 0-1 FH (0-0)
0-1  Björn Daníel Sverrisson 78.mín.

Selfoss: Ismet Duracak – Ivar Skjerve, Stefán Ragnar Guðlaugsson, Endre Ove Brenne, Andri Freyr Björnsson – Ólafur Karl Finsen (Tómas Leifsson 72.mín.), Ingólfur Þórarinsson, Babacar Sarr, Jon Andre Royrane (Joe Tillen 81.mín.), Jón Daði Böðvarsson – Abdoulaye Ndiaye (Viðar Örn Kjartansson 67.mín.).
Varamenn: Sigurður Eyberg Guðlaugsson, Agnar Bragi Magnússon, Gunnar Már Hallgrímsson, Robert Sandnes.
Gul spjöld: Andri Freyr Björnsson 41.mín.

FH:  Gunnleifur Gunnleifsson – Guðjón Árni Antoníusson, Freyr Bjarnason, Guðmann Þórisson, Viktor Örn Guðmundsson – Pétur Viðarsson, Bjarki Gunnlaugsson, Björn Daníel Sverrisson (Hólmar Örn Rúnarsson 90.mín.) – Ólafur Páll Snorrason (Emil Pálsson 85.mín.), Atli Viðar Björnsson (Albert Brynjar Ingason 74.mín.), Atli Guðnason.
Varamenn: Emil Pálsson, Jón Ragnar Jónsson, Róbert Örn Óskarsson, Hafþór Þrastarson, Brynjar Ásgeir Guðmundsson, Hólmar Örn Rúnarsson.
Gul spjöld: Viktor Örn Guðmundsson 41.mín., Ólafur Páll Snorrason 76.mín.

———-

KR – ÍBV (2-0)
1-0  Kjartan Henry Finnbogason (vsp.) 35.mín.
2-0  Kjartan Henry Finnbogason (vsp.) 45.mín.
2-1  Aaron Spear 47.mín.
2-2  Tonny Mawejje 68.mín.
3-2  Kjartan Henry Finnbogason (vsp.) 77.mín.

Leikur KR-inga og Eyjamanna var harla tíðindalítill framan af, gestirnir vörðust af miklum krafti og forðuðust það eins og heitan eldinn að taka áhættu í færslum eða gönuhlaupum og KR-ingum gekk sannast sagna ila að finna smugur á vel skipulagðri vörn þeirra.  Christian Olsen var ekki öfundsverður af hlutskipti sínu aleinn og yfirgefinn í framlínu ÍBV, Ian Jeffs sýndi þó annað veifið tilburði til að smeygja sér framar á völlinn í von um að auka sóknarkraftinn, en KR-ingar voru miklu meira með boltann og mun líklegri til afreka.  KR-ingar fengu vítaspyrnu eftir rúmlega hálftíma leik þegar stuggað var við Kjartani Henry Finnbogasyni inni á teig og um réttmæti dómsins má líklega deila.  Kjartan Henry hafði hins vegar minnstar áhyggjur af því og skoraði af öryggi úr spyrnunni.  KR-ingar voru enn líklegri það sem eftir lifði fyrri hálfleik, sóknaraðgerðir Eyjamanna voru afar tilviljanakenndar og kraftlitlar og andartökum áður en flautað var til hálfleiks fengu KR-ingar aðra vítaspyrnu.  Boltinn hrökk þá upp í hönd eins varnarmanna ÍBV nánast á vítateiglínunni og eftir að hafa melt málið af yfirvegun og ráðfært sig við aðstoðardómara benti Magnús Þórisson dómari á vítapunktinn og blés í flautuna sem aldrei fyrr.  Kjartan Henry tók spyrnuna og notaði sömu uppskriftina, þrumaði boltanum út í hliðarnetið vinstra megin án þess að Dhaira kæmi við nokkrum vörnum.  Staðan í hálfleik var því 2-0 fyrir KR.
Síðari hálfleikurinn var ljómandi líflegur og áhorfendur voru varla búnir að koma sér fyrir þegar varamaðurinn Aaron Spear minnkaði muninn fyrir Eyjamenn.  Spear fylgdi þá eftir skoti Christian Olsen sem Hannes varði ágætlega í  markinu og mokaði boltanum yfir línuna.  Heldur lifnaði yfir leik Eyjamanna, þeir voru miklu sókndjarfari og beinskeyttari en þeir höfðu verið í fyrri hálfleiknum og uppskáru í samræmi við aukinn sóknarkraft þegar Tonny Mawejje jafnaði metin á 68.mínútu.  Mawejje skoraði með góðu vinstrifótarskoti eftir snarpa og laglega sókn og segja má að markið hafi legið í loftinu.  KR-ingar voru sestir aftur á hælana, en virtust þó átta sig á alvöru málsins þegar staðan var orðin jöfn.  Þeir fengu þriðju vítaspyrnuna á 77.mínútu, en þá var brotið á Óskari Erni inni á teig.  Kjartan Henry breytti til að þessu sinni, þrumaði nánast í mitt markið og kom KR í 3-2.  SEyjamenn neituðu að gefast upp og fengu vítaspyrnu í uppbótartíma þegar brotið var á Brynja Gauta inni á vítateig.  Fjórða vítspyrna kvöldsins staðreynd, en Hannes Þór Halldórsson, markvörður KR, gerði sér hins vegar lítið fyrir og varði spyrnu Matt Garner.  KR-ingar fögnuðu því langþráðum og strembnum sigri í vesturbænum í leik sem framan var heldur bragðdaufur og flatur, en leystist upp í meiri og meiri skemmtun eftir því sem á kvöldið leið.

KR: Hannes Þór Halldórson – Guðmundur Reynir Gunnarsson, Rhys Weston, Grétar Sigfinnur Sigurðarson, Haukur Heiðar Hauksson – Bjarni Guðjónson (f), Baldur Sigurðsson, Viktor Bjarki Arnarsson (Egill Jónsson 46.mín.)- Óskar Örn Hauksson, Dofri Snorra (Emil Atlason 81.mín.) – Kjartan Henry Finnbogason (Þorsteinn Már Ragnarsson 81.mín.).
Varamenn: Gunnar Þór Gunnarsson, Magnús Már Lúðvíksson, Fjalar Þorgeirsson, Atli Sigurjónsson.
Gult spjald: Rhys Weston 90.mín.

ÍBV: Abel Dhaira – Matt Garner, Rasmus Christansen, Brynjar Gauti Guðjónsson, Arnór Eyvar Ólafsson – Tonny Mawejje, Guðmundur Þórarinsson (Aaron Spear 46.mín.), George Baldock, Ian Jeffs, Víðir Þorvarðarson (Eyþór Helgi Birgisson 82.mín.) – Christian Steen Olsen.
Varamenn: Yngvi Magnús Borgþórsson,, Ragnar Leósson, Gauti Þorvarðarson, Guðjón Orri Sigurjónsson, Bjarki Axelsson.
Gul spjöld: Rasmun Christiansen 60.mín., George Baldock 72.mín., Matt Garner 80.mín.

Myndir: Eyjólfur Garðarsson og Einar Ásgeirsson.

Mynd: Haukar

Gunnar Berg Viktorsson verður ráðinn þjálfari karlaliðs Stjörnunnar sem leikur í fyrstu deildinni í handknattleik. Hann tekur við starfinu af Roland Eradze sem hætti með liðið eftir nýafstaðið tímabil og skrifað verður undir samninga þess efnis síðar í dag. Ragnheiður Traustadóttir, formaður handknattleiksdeildar Stjörnunnar, staðfesti þetta nú síðdegis við Sport.is.

Gunnar Berg ætti að vera handboltaáhugafólki að góðu kunnur en hann lék með landsliðinu auk þess sem hann lék erlendis um árabil. Síðastliðin vetur var hann Aroni Kristjánssyni til aðstoðar hjá Haukum.

Stjarnan endaði í þriðja sæti 1. deildar í vetur og sló síðan Víking út í undanúsrlitum áður en liðið beið lægri hlut í umspilsleikjum gegn Aftureldingu um laust sæti í N1-deildinni.

Mynd: Nordic Photos

Sir Alex Ferguson, knattspyrnustjóri Manchester United, hefur verið útnefndur besti stjóri ensku úrvalsdeildarinnar frá stofnun hennar árið 1992. Á þeim tíma hefur hann tólf sinnum hampað sigri í ensku úrvalsdeildinni, unnið enska bikarinn fimm sinnum og deildarbikarinn fjórum sinnum. Ferguson, sem er 70 ára gamall, hefur stjórnað United í 25 ár og varð hann langlífasti stjórinn í sögu félagsins árið 2010 þegar hann tók fram úr Sir Matt Busby.

Ferguson hefur marga fjöruna sopið á litríkum knattspyrnustjóraferli sínum og er hann þekktur fyrir að láta leikmenn liðs síns ekki vaða yfir sig á skítugum skónum. Árið 2003 lenti hann í deilum við David Beckham, leikmann liðsins, og endaði rifrildi þeirra með því að Ferguson sparkaði takkaskó í andlitið á leikmanninum.

Einnig er frægt þegar Ferguson neitaði að fara í viðtöl hjá breska ríkisútvarpinu, BBC, eftir að það sýndi heimildarmynd um son hans Darren. Ferguson fór í kjölfarið ekki í viðtöl hjá BBC í sjö ár og lét aðstoðarmenn sína ávallt um það. Manchester United þurfti í kjölfarið að greiða sektir en að lokum náðust sættir með Ferguson og framkvæmdarstjóra BBC.

Manchester United hafnaði í öðru sæti ensku úrvalsdeildarinnar á þessu tímabili eftir eina hörðustu toppbaráttu í manna minnum gegn Manchester City. Liðin luku bæði móti með 89 stig en City var með betri markatölu og hampaði því titilinum.

Mynd: NordicPhotos

Tékkneski markvörðurinn Petr Cech, sem leikur með Chelsea, er greinilega afar vinsæll í heimalandi en hann hefur nú verið kjörinn knattspyrnumaður ársins af íþróttafréttamönnum þar í landi, sjöunda árið í röð.

Áður hafði Pavel Nedved, sem lengstum lék með Juventus, oftast hlotið þessa nafnbót eða sex sinnum en nú hefur Cech oftast fengið viðurkenninguna. Í ár kom Tomas Rosicky í öðru sæti og Peter Jiracek, leikmaður Wolfsburg, var þriðji í röðinni.

Cech átti fínt ár hjá Chelsea þar sem liðið varð enskur bikarmeistari auk þess sem þeir eiga eftir að mæta Bayern Munchen í úrslitum Meistaradeildar Evrópu en sá leikur fer fram næstkomandi laugardag.

Mynd: Nordic Photos

Arsene Wenger, knattspyrnustjóri Arsenal, mun á morgun funda við hollenska framherjann Robin van Persie um framtíð þess síðarnefnda hjá félaginu. Persie hefur átt lygilegt tímabil í ensku úrvaldsdeildinni og mörg stórlið vilja ólm krækja í leikmanninn en samningur hans við Arsenal rennur út eftir næsta tímabil.

Enskir fjölmiðlar greina frá því að Wenger og Persie muni hittast á fundi heima hjá knattspyrnustjóranum til þess að finna lausn mála. Persie hefur sjálfur ekki svarað opinberlega hvort hann vilji vera áfram en Arsenal ætæar að bjóða honum fjögurra ára samning sem myndi rífa launaþak liðsins.

Robin van Persie var spurður út í framtíð sína á dögunum en svarið var frekar loðið. "Sama hvað gerist í framtíðinni þá hef ég átt frábær ár hérna og ég elska þetta félag. Það mun aldrei breytast."

Mynd: Eyjólfur Garðarsson

Fimm leikir eru á dagskrá Pepsi deildar karla í kvöld þegar að þriðja umferðin klárast. Vegna veðurs fór aðeins einn leikur fram í gær en þá vann Stjarnan nauman sigur á Keflvíkingum suður með sjó.

Breiðablik tekur á móti Val á Kópavogsvelli í kvöld en liðin hafa átt ólíku gengi að fagna í fyrstu tveimur leikjunum. Valsarar er með fullt hús stiga á meðan Blikar eiga ennþá eftir að skora mark.

Selfyssingar komu á óvart í fyrstu umferðinni og sigruðu ÍBV en töpuðu síðan gegn Valsmönnum í seinustu umferð. Það verður því fróðlegt að sjá hvernig nýliðunum mun vegna gegn Íslandsmeistaraefnunum í FH sem hafa fjögur stig eftir tvo leiki.

Framarar, sem komu inn í mótið fullir af væntingum eftir blómlegt gengi í vorleikjunum, eru stigalausir eftir eftir fyrstu tvo leikina eftir tvo 1-0 tapleiki. Andstæðingar þeirra í kvöld eru Guðjón Þórðarson og félagar úr Grindavík sem vilja ólmir kvitta fyrir 4-0 skell gegn Keflavík á heimavelli í síðustu umferð.

Skagamenn hafa átt sannkallaða draumaendurkomu í deild þeirra bestu og hafa fullt hú stiga eftir tvær umferðir Liðið vann epískan sigur á KR í seinustu umferð þar sem týndi sonurinn, Jóhannes Karl Guðjónsson skoraði mark af dýrari gerðinni. Það verður gaman að sjá hvernig þeim mun vegna gegn Fylkismönnum, sem hafa verið fastir fyrir í fyrstu tveimur leikjunum, og ekki tapað ennþá.

Umferðin klárast svo í Vesturbænum þar sem KR mætir ÍBV. Viðreignir þessara liða voru vendipunktar á Íslandsmótinu í fyrra þar sem þessi lið háðu lengst um harða baráttu á toppi deildarinnar en í ár er liðunum spáð ólíku gengu. Bæði lið hafa þó farið höktandi af stað inn í mótið og hafa einungis eitt stig eftir tvo leiki.

Leikir kvöldsins:
Kl. 19:15 Breiðablik – Valur | Kópavogsvöllur
Kl. 19:15 Selfoss – FH | Selfossvöllur
Kl. 19:15 Fram – Grindavík | Laugardalsvöllur
Kl. 19:15 Fylkir – ÍA | Fylkisvöllur
Kl. 20:00 KR – ÍBV | KR-völlur | Í beinni á Stöð2Sport