Ingvar Guðjónsson

Þessa dagana og næstu helgar er nóg um verkefni hjá dómurum og eftirlitsmönnum erlendis, en Ingvar Guðjónsson og Jónas Elíasson fá risastórt verkefni næstu helgi er þeir dæma leik Madídar og Silkeborg. Þeir eru nú heim á leið eftir að hafa dæmt á Asíu Meistaramóti karla undanfarnar tvær vikur.

Í gær dæmdu þeir undanúrslitaleik Sádí Arabíu og Kóreu á mótinu en sá leikur endaði með eins marks sigur Kóreu 27-26.

Hér að neðan má sjá upptalningu á verkefnum hjá dómurum og eftirlitsmönnum erlendis á næstu misserum:

Ingvar Guðjónsson og Jónas Elíasson munu dæma leik BM Atletico Madrid og Bjerringbro-Silkeborg í Meistaradeild Evrópu karla en leikið verður í Madrid á Spáni laugardaginn 11.febrúar.

Guðjón L. Sigurðsson verður eftirlitsmaður á síðari leik Team Tvis Holstebro og Team Esbjerg í Evrópukeppni félagsliða kvenna en leikið verður í Holstebro laugardaginn 11.febrúar

Kristján Halldórsson verður eftirlitsmaður á fyrri leik Viborg HK og IK Savehof í Evrópukeppni bikarhafa kvenna en leikið verður í Viborg í Danmörku laugardaginn 11.febrúar.

Helga Magnúsdóttir verður eftirlitsmaður Larvik og Grupu Asfi Itxako Navarra í Meistaradeild Evópu kvenna en leikið verður í Larvik í Noregi sunnudaginn 12.febrúar.

Arnar Sigurjónsson og Svavar Pétursson munu dæma leik OIF Arendal og Vfl Gummersbach í Evrópukeppni bikarhafa karla en leikið verður Nedenes í Noregi laugardaginn 18.febrúar.

Ólafur Örn Haraldsson verður eftirlitsmaður á síðari leik Rhein-Neckar Löwen og Eskilstuna Guif í 16 liða úrslitum Evrópukeppni félagsliða karla en leikið verður í Mannheim í Þýskalandi laugardaginn 18.febrúar.

Mynd: Hilmar Þór

KA/Þór lagði HK afar óvænt að velli, 23-22, er liðin áttust við í KA-heimilinu á Akureyri í dag í N1-deild kvenna í handknattleik. Norðanstúlkur höfðu yfirhöndina nánast allan leikinn og var sigurinn verðskuldaður. Frida Petersen átti afbragðsleik í marki KA/Þórs og átti stóran þátt í sigrinum. Hún varði sautján skot, þar af tólf í fyrri hálfleik, og nokkur þeirra á afar mikilvægum augnablikum.

Þetta er aðeins annar sigur KA/Þórs á leiktíðinni sem lyftir sér upp af botninum upp í áttunda sæti deildarinnar með fjögur stig. HK hefur áfram tólf stig í þriðja sæti.

KA/Þór 23-22 HK (11-8)

Norðanstúlkur byrjuðu leikinn af krafti og komust í 4-0. HK skoraði ekki mark fyrstu sex mínúturnar en hin færeyska Frida Petersen í marki KA/Þórs var í banastuði og varði átta skot á fyrsta korterinu. HK efldist þegar leið á fyrri hálfleikinn og minnkaði muninn í tvö mörk, 6-4, en KA/Þór náði fjögurra marka forystu á ný, 8-4, um miðjan fyrri hálfleik. Næstu fimm mínútur voru markalausar og sóknarleikur beggja liða arfaslakur. HK minnkaði muninn í tvö mörk á ný, 9-7, þegar tvær og hálf mínúta voru til leikhlés. KA/Þór jók forskotið í fjögur mörk á ný, 11-7, en Brynja Magnúsdóttir minnkaði muninn fyrir HK niður þrjú mörk með skoti beint úr aukakasti eftir leiktíminn var runninn út. Staðan 11-8 í hálfleik.

HK byrjaði seinni hálfleikinn betur og skoraði fyrstu tvö mörkin og minnkaði muninn í eitt mark í fyrsta skiptið í leiknum, 11-10. Þá komu þrjú mörk í röð hjá KA/Þór sem náði fjögurra marka forystu á ný, 14-10. HK jafnaði leikinn í 17-17 á 48. mínútu og var þá í fyrsta sinn jafnt í tölum. Þegar þrjár mínútur voru eftir var staðan enn jöfn, 21-21. Kolbrá Ingólfsdóttir kom heimastúlkum yfir, 22-21, þegar ein mínúta var eftir. HK lagði af stað í sókn og Brynja Magnúsdóttir tók skot en Frida í marki KA/Þórs greip boltann og KA/Þór skoraði í kjölfarið 23 markið sitt í leiknum. HK náði minnka muninn í eitt mark þegar tólf sekúndur voru til leiksloka en lengra komust þær ekki og KA/Þór fagnaði óvæntum og dýrmætum sigri í botnbaráttunni.

Mörk KA/Þórs: Kolbrún Gígja Einarsdóttir 6, Ásdís Sigurðardóttir 6, Martha Hermannsdóttir 5 (1), Katrín Vilhjálmsdóttir 3 , Kolbrá Ingólfsdóttir 2.
Varin skot: Frida Petersen 17 (1).

Mörk HK: Brynja Magnúsdóttir 6 (1), Heiðrún Björk Helgadóttir 4, Elva Björg Arnarsdóttir 3, Elísa Ósk Viðarsdóttir 1, Arna Björk Almarsdóttir 2,  Sigríður Hauksdóttir 2, Valgerður Ýr Þorsteinsdóttir 1, Elín Anna Baldursdóttir 1, Jóna Sigríður Halldórsdóttir 2.
Varin skot: Ólöf Kolbrún Ragnarsdóttir 13.

Mynd: Sport.is

Í dag áttust við í N1 deild kvenna lið Gróttu og Hauka, sem og ÍBV og Vals. Valskonur, sem tróna á toppi deildarinnar ásamt fram, fengu í fyrsta skipti í vetur yfir 30 mörk á sig í leik en það kom þó ekki að sök þegar að þær löggðu ÍBV, 39-32. Grótta gerði sér lítið fyrir og vann Hauka á heimavelli og eru nú aðeins einu stigi á eftir Haukum í deildinni.

ÍBV 32-39 Valur (18-21)

Gríðarmikið var skorað í Vestmannaeyjum í dag þegar að heimastúlkur í ÍBV fengu Íslandsmeistara Vals í heimsókn. Heil 39 mörk voru skoruð í fyrri hálfleik en staðan var 18-21 eftir 30 mínútna leik. Valskonur leiddu mest allann leikinn en þær gáfu í á endasprettinum og tryggðu sér 7 marka sigur, 39-32. Með þessum sigri jöfnuðu þær Fram á stigum á toppi deildarinnar en bæði lið hafa 18 stig. ÍBV situr í 4. sætinu með 12 stig, jafnmikið og HK. Þær prísa sig væntanlega sælar að KA/Þór skellti HK á Akureyri í dag. Markahæst hjá Val í leiknum var Þorgerður Anna Atladóttir en hjá ÍBV var Georgeta Grigore  markahæst með 10 mörk. Þess má geta að Valskonur eru nú verðurtepptar í Vestmannaeyjum sökum slæms sjóveðurs og hefur ferð Herjólfs verið frestað þar til hálf 9 í fyrramálið.

Mörk ÍBV: Georgeta Grigore 10, Ester Óskarsdóttir 9, Ivana Mladenovic 8, Aníta Elíasdóttir 2, Marijana Trbojevic 2, Þórsteina Sigurbjörnsdóttir 1.

Mörk Vals: Þorgerður Anna Atladóttir 10, Anna Úrsúla Guðmundsdóttir 7, Dagný Skúladóttir 5, Ragnhildur Rósa Guðmundsdóttir 5, Hrafnhildur Ósk Skúladóttir 5, Karólína Bæhrenz Gunnarsdóttir 4, Kristín Guðmundsdóttir 2, Aðalheiður Hreinsdóttir 1.

Grótta 24-19 Haukar (12-8)

Grótta, sem var aðeins með 1 stig þegar að N1 deild kvenna fór í jólafrí, hefur heldur betur hafið nýja árið af krafti. Þær hafa nú unnið báða leiki sína á nýju ári og eru komnar með 5 stig í deildinni. Í dag sigruðu Gróttustúlkur Hauka. Grótta leiddi nánast allann leikinn og uppskar að lokum 5 marka sigur, 24-19. Sunna María Einarsdóttir var atkvæðamest hjá Gróttu í dag með 10 mörk. Hjá Haukum skoraði Marija Gedroit mest af öllum eða 6 mörk. Haukar hafa nú 6 stig í 6. sæti en Grótta er með 5 stig í 7. sæti.

Mörk Gróttu: Sunna María Einarsdóttir 10, Unnur Ómarsdóttir 6, Laufey Ásta Guðmundsdóttir 6, Björg Fenger 1, Rebekka Guðmundsdóttir 1.

Mörk Hauka: Marija Gedroit 6, Silja Ísberg 4, Ásta Björk Agnarsdóttir 3, Karen Helga Sigurjónsdóttir 2, Viktoría Valdimarsdóttir 1, Díana Sigmarsdóttir 1, Elsa Björg Árnadóttir 1, Ásthildur Friðgeirsdóttir 1.

Forseti Serbíu tekur í hönd Darko Stanic

Hann var einn besti leikmaðurinn á EM í Serbíu og sá leikmaður sem fáir vissu hver var fyrir mót. Darko Stanic, landsliðsmarkvörður Serba, er nú á öllum forsíðum dagblaða og tímarita í Serbíu, Svartfjallandi, Makedóníu, Krótíu og á fleiri stöðum.

Núna veit fólk, sem er ekki einu sinni handboltaáhugamenn hver Stanic er og allt um hann; líf hans, feril hans og einnig dóp-vandamál hans, en hinn 34. ára gamli Stanic hefur lengi átt í erfiðleikum með að halda sig frá dópi.

Eitt af því áhugaverðasta sem kemur fram í blöðum og tímaritum þessum í áðurnefndum löndum er að Darko Stanic er launahæsti íþróttamaður Makedóníu, þar sem hann spilar með HC Metalurg, undir stjórn Lino Cervar. Stanic mun hins vegar yfirgefa Makedóníu eftir þetta tímabil og ganga til liðs við Göppingen í Þýskalandi.

Darko Stanic

Mynd: Sævar Geir Sigurjónsson

Eins og kom fram á Sport.is í gær fékk Daníel Berg Grétarsson, leikmaður HK rautt spjald í síðari hálfleik í gær er HK-ingar lögðu Akureyri að velli í N1-deild karla á heimavelli síðarnefnda liðsins, 27-25 í fyrsta leik deildarinnar eftir jóla- og EM frí.

Skiptar skoðanir voru um spjaldið sem Daníel fékk en myndskeið af atvikinu má sjá hér í frétt Sport.is um málið í dag.

Heimir hefði aldrei fengið rautt fyrir þetta

Sport.is ræddi við Daníel Berg í morgunsárið og spurði hann fyrst að því hvort um rautt spjald hefði verið að ræða, að hans mati.

“Ég skal orða það þannig að ef þetta hafði verið Heimir að brjóta á mér þá hefði þetta aldrei verið rautt, það skiptir máli hverjum maður er að brjóta á í svona tilfelli,” sagði Daníel sem var að spila sinn fyrsta leik á tímabilinu en hann hefur átt við meiðsli að stríða.

“Heimir er reyndur í þessu og því fær hann kannski eitthvað sem að aðrir fá ekki, það eru mikil læti í Höllinni og bekkurinn hjá Akureyri og Heimir setja mikla pressu á dómarann.”

Lenti á harðasta “bicep-num” í bransanum

“Heimir lendir með andlitið á bicep-num á mér sem er sá harðasti í bransanum og dómarinn sér blóð og kiknar þá undan pressunni og ákveður að gefa mér rautt. Dómarar gera mistök alveg eins og allir leikmenn.”

Sævar var ekki með leiðindi

Nokkuð var talað um viðbrögð Heimis eftir brotið en hann lét Daníel heyra það. Þá kom fram í textalýsingu Vísis frá leiknum að Sævar Árnason, aðstoðarþjálfari Akureyrar hafi skipað Daníeli að fara upp í stúku. Daníel segir að það sé ekki rétt og allir hefðu skilið sáttir.

“Ég var voða lítið var við hvað átti sér stað eftir atvikið, var bara í sjokki yfir þessu, ég fæ nánast aldrei 2 mínútur hvað þá rautt. Sævar var ekkert með nein leiðindi né að skipa mér upp í stúku, hann er herramaður sem ég ber mikla virðingu fyrir. Það átti sér bara stað smá misskilningur okkar  á milli við ræddum það eftir leikinn og tókumst í hendur.”

Fór niður í kjallara að pútta eftir spjaldið

Aðspurður hvernig dómarar leiksins, þeir Gísli Jóhannsson og Hafsteinn Ingibergsson hefðu staðið sig sagði Daníel: “Mér finnst að það sé verið að tala of mikið um dómarana, þeir gerðu sitt besta og ég gat ekki séð að þeir hefðu átt svona slæman dag, allavega ekki meðan ég var inn á.”

Starfsmenn liðanna gagnrýndu störf dómara mest síðasta stundarfjórðunginn, en Daníel fékk einmitt rauða spjaldið á 47. mínútu leiksins. Eftir það fór hann ekki upp í stúku, heldur gerði afar áhugaverðan og einkennilegan hlut.

“Eftir rauða spjaldið þá veit ég ekki hvernig dómararnir voru því ég sá ekki meira af leiknum. Ég fór bara niður í kjallara í Höllinni að æfa mig að pútta, ég er nefnilega frekar slakur golfari og sérstaklega púttari. Það er nefnilega frábær aðstaða þar,” sagði Daníel kíminn að lokum.

Mynd: TV2 Sporten

Þórey Rósa Stefánsdóttir, landsliðskona í handknatleik, hefur framlengt samning sinn við topplið dönsku úrvalsdeildarinnar, Team Tvis Holstebro, til tveggja ára.  Þórey Rósa, sem er 22 ára, gekk til liðs við danska félagið frá Vfl Oldenburg í Þýskalandi í júlí í fyrra og hefur vakið mikla lukku í Danaveldi.

“Hún hentar okkar leikstíl mjög vel,” segir Niels Agesen, þjálfari Team Tvis Holstebro, í fréttatilkynningu sem gefin var út í tilefni nýs samnings.  “Hún hefur burði til að verða enn betri en hún er í dag, bæði í vörn og sókn, og stefnir í að verða einn besti hornamaður deildarinnar.  Hún hefur sprengikraft og er mjög öflug í hraðaupphlaupum.”

Þórey Rósa er uppalinn ÍR-ingur og lék með Fram í meistaraflokki áður en hún hleypti heimdraganum og gekk til liðs við Hysen í Hollandi.  Hún lék með Vfl Oldenburg frá janúar í fyrra og fram á mitt ár, en þá flutti hún sig yfir til Team Tvis Holstebro.
“Þetta er gott félag með mikinn metnað,” er haft eftir Þóreyju Rósu.  “Ég spila í dag með góðum og duglegum leikmönnum, hef tekið miklum framförum og get bætt mig enn meira.  Danskur handbolti hentar mér mjög vel, hann er hraður og gefur möguleika á hraðaupphlaupum.  Hér er spilaður góður handbolti, betri en í Hollandi og Þýskalandi.”

Mynd: Sævar Geir Sigurjónsson

Daníel Berg Grétarsson, handknattleiksmaður úr HK lék sinn fyrsta leik á þessu tímabili í gær er HK sigraði Akureyri á útivelli, 27-25, eftir að hafa leitt 13-11 í hálfleik. Daníel, sem hefur verið að glíma við meiðsli það sem af er vetri fékk beint rautt spjald á 47. mínútu fyrir meint brot á Heimi Erni, fyrirliða Akureyrar í hraðarupphlaupi.

Dómarar leiksins, þeir Gísli Hlynur Jóhannsson og Hafsteinn Ingibergsson sem voru mikið gagnrýndir eftir leikinn skiluðu ekki inn skýrslu með rauða spjaldinu, en þeir hafa metið sem svo að brotið hafi ekki verið það gróft. Daníel verður því ekki í banni í næstu umferð, 14. umferðinni er HK fær Val í heimsókn.

Þeir Gísli og Hafsteinn veifuðu tvisvar sinnum fjórum puttum í gær en þá höfðu þeir gefið tveggja mínútútna brottvísun en leikmenn tuðað í kjölfarið og fengið tvær mínútur til viðbótar. Strax á 9. mínútu leiksins fékk Akureyringurinn, Guðlaugur Arnarson tveggja mínútútna brottvísun fyrir kjaft.  Á 40. mínútu fékk Hörður Fannar Sigþórsson í Akureyri tveggja mínútna brottvísun fyrir mótmæli, en mikil harka virðist hafa verið í þessum leik í gær, sem var einn af fjórum sem fór fram er N1-deild karla hófst á nýjan leik eftir jóla- og EM frí.

Hér að neðan má sjá lýsingar á frammistöðu dómarana í gær frá ýmsum fjölmiðlum:

“Dómarar leiksins voru í aðalhlutverki á tíma en bæði lið voru ósátt með framgöngu þeirra. Frammistaða þeirra var ekki ýkja góð, án þess að það hallaði sérstaklega á liðin. Daníel Berg fékk meðal annars rautt spjald fyrir brot úr hraðaupphlaupi,” segir í textalýsingu Vísis.

“Norðanmönnum  gekk erfiðlega að saxa á forskotið gegn sterki vörn HK-liðsins sem hélt Akureyringum í hæfilegri fjarlægð. Það dró til tíðinda á 17. mínútu leiksins er Daníel Berg Grétarsson hjá HK fékk beint rautt spjald, er hann virtist taka um höfuð Heimis Arnar Árnasonar fyrirliða Akureyrar þegar hann reyndi að brjótast í gegnum varnarmúr gestanna. Allt ætlaði um koll að keyra en Heimir var allt annað en sáttur,” segir í umfjöllun Sport.is um leikinn í gær.

“Rautt spjald á Daníel Berg. Hann reyndi að brjóta á Heimi Erni og virðist hafa tekið um hausinn á honum. Heimir Örn er alveg brjálaður og Daníel er ekkert að flýta sér af velli,” segir í textalýsingu Mbl.

Skrípaleikur eftir rauða spjaldið
“Daníel Berg fær rautt spjald sem ég held að sé alveg rétt að hann hafi fengið. Það er hægt að réttlæta þetta spjald. Í kjölfarið hefst skrípaleikur á vellinum, bæði hjá leikmönnum og dómurum,” sagði Kristinn Guðmundsson, þjálfari HK í viðtali við Ragnar Njálsson á “Sportið með Ragga Njáls” á Facebook.

“Síðan hefst hér einhver darraðadans undir lokin í kjölfarið á þessu rauða spjaldi hans Danna. Mér fannst bara dómararnir missa tökin á þessum leik þá og hleypa þeim aftur inn í leikinn en við lifðum þetta af, sýndum karakter og skiluðum hérna gríðarlega mikilvægum stigum í hús,” sagði Kristinn við Vísi.

Hér að neðan má sjá þetta umdeilanlega atvik:

Mynd: Ómar Smith

Óskar Bjarni Óskarsson, þjálfari Vals í N1-deild karla sagði í viðtali við Sport.is í gær að Ólafur Bjarki Ragnarsson, miðjumaður úr HK væri besti maður N1-deildarinnar. Valur mætir HK í næstu umferð og sagði Óskar þann leik verða erfiðan og jafnframt að sínir menn þyrftu að kalla fram það sama gegn HK og þeir gerðu í gær er þeir lögðu topplið Hauka að velli.

“HK er eitt best mannaða lið deildarinnar, með frábæra þjálfara og frábæra leikmenn og Ólaf Bjarka (Ragnarsson) besta leikmann deildarinnar. Við þurfum að kalla það sama fram gegn HK,” sagði Óskar Bjarni, eftir leik Vals og Hauka í gær sem Valsmenn sigurðu 25-18.

Ólafur Bjarki, var einn af þeim leikmönnum úr íslensku deildinni sem var með íslenska landsliðinu á EM í Serbíu en hann þótti standa sig vel þegar hann fékk tækifærið.

Mynd: Hilmar Þór

Valur tók á móti Haukum í N1-deild karla. Bæði lið vildu hefja leik að krafti eftir EM hlé í deildinni. Haukar höfðu spilað liða best fyrir áramót og voru á toppi deildarinnar, Valsmenn voru í baráttu um að komast í úrslitakeppnina. Það voru Valsmenn sem höfðu góðan sigur á toppliði Hauka sem spiluðu ekki vel í kvöld, lokatölur 25-18.

Valur 25 – 18 Haukar  (8-8)

Fyrri hálfleikur var illa leikin af báðum liðum og leikmenn virtust ætla að vera lengi í gang. Valsmenn leiddu fyrstu tuttugu mínúturnar þó svo að munurinn hafi aldrei verið meiri en eitt mark. Markmennirnir, Aron Rafn Hauka megin og Hlynur Mortens hjá Val vörðu ekki mikið en leikmenn skutu mikið framhjá og í marksúlurnar. Þegar 23 mínútur voru búnar misstu Valsmenn Gunnar Harðarson útaf og þá náðu Haukarnir tveggja marka forskoti 8-6 og virtust ætla að stinga af. Heimamenn létu sér ekki segjast og jöfnuðu í 8-8 með miklum klaufaskap Haukanna sem var ólíkt Hafnarfjarðarliðinu.
Jafnt var í hálfleik og það lið sem myndi fyrir alvöru mæta til seinni hálfleiks gæti farið langt með að vinna leikinn.

Í seinni hálfleik voru Valsmenn einfaldlega betri, sér í lagi varnarlega. Sóknarleikur Hauka var dapur, vörnin slök og markvarlsan eftir því. Lykilmenn eins og Gylfi Gylfason og Tjörvi Þorgeirsson voru slakir og liðið sem heild virkaði andlaust. Það var helst Freyr Brynjarsson sem barðist og skoraði. Mikið munaði um Valdimar Þórsson í flæði sóknarleiks Vals sem var með góðu móti. Menn eins og Finnur Stefánsson og Anton Rúnarsson skiluðu sínu auk Hlyns í markinu. Það var þó vörn Vals sem stóð vaktina vel í seinni hálfleiknum sérstaklega sem skóp sigurinn, 18 mörk Hauka í leiknum segja sitt um það. Það verður að minnast á dómgæslu leiksins en hún var á köflum skrautleg og ýmsir dómar sem voru furðulegir.
Leiknum lauk með sanngjörnum sigri Vals, lokatölur 25-18.

Mörk Vals: Anton Rúnarsson 10,  Finnur Stefánsson 7, Sturla Ásgeirsson 3, Magnús Einarsson 2, Orri Gíslason 1, Valdimar Þórsson 1,
Varin skot: Hlynur Mortens 8, Ingvar Guðmundsson 1

Mörk Hauka: Freyr Brynjarsson 5, Gylfi Gylfason 3, Heimir Heimisson 2, Sveinn Þorgeirsson 2, Stefán Sigurmannsson 2, Tjörvi Þorgeirsson 2,  Þórður Guðmundsson 1 , Nemanja Malovic 1
Varin skot: Aron Eðvaldsson 10.

Myndir: Hilmar Þór.

Mynd: Sævar Geir Sigurjónsson

HK nældi sér í tvö dýrmæt stig í kvöld í N1-deild karla í handknattleik eftir tveggja marka sigur gegn Akureyri fyrir norðan, 27-25. HK lagði grunninn að sigrinum með frábærum kafla undir lok fyrri hálfleiks og í upphafi þess síðari, en liðið náði mest sex marka forystu í leiknum. Akureyringar sýndu karakter með að koma til baka og jafna leikinn, en eftir æsilegar lokamínútur voru það HK-menn sem fögnuðu í Höllinni á Akureyri.

HK fer með sigrinum upp í 17 stig og hefur þriggja stiga forystu á Akureyri sem hefur 14 stig.

Akureyri 25-27 HK (11-13)

Leikurinn var hníjafn í byrjun en Akureyringar fyrri til þess að skora. Heimamenn náðu fljótlega yfirhöndinni og komust í 6-3 og 7-4. Norðanmenn voru fastir fyrir í vörninni og spiluðu fínan sóknarleik en HK-ingar voru í basli. Forysta heimamanna var orðin fjögur mörk, 8-4, þegar fyrri hálfleikurinn var tæplega hálfnaður og HK tók leikhlé. Lítið var skorað næstu mínúturnar þar sem sóknarleikur beggja liða var slakur en varnarleikurinn að sama skapi ágætur. HK komst betur inn í leikinn þegar á leið. Ólafur Bjarki Ragnarsson komst í gírinn og skoraði þrjú mörk í röð fyrir HK sem minnkaði muninn í eitt mark, 10-9, þegar fimm mínútur voru til leikhlés. Gestirnir komust yfir, 11-10, í fyrsta skiptið í leiknum með frábærum kafla undir lok fyrri hálfleiks og höfðu tveggja marka forystu í hálfleik, 13-11.

HK byrjaði seinni hálfleikinn með látum og komst sex mörkum yfir í byrjun, 17-11, og héldu áfram þar sem frá var horfið í fyrri hálfleik. Akureyringar voru í tómu tjóni í sóknarleiknum og misstu boltann oft klaufalega frá sér. HK gekk á lagið og skoraði nokkur hraðaupphlaupsmörk í röð. Það var helst Bjarni Fritzson sem var með lífsmarki í sóknarleik Akureyringa framan af seinni hálfleik og reif upp stemmninguna hjá áhorfendum í Höllinni.

Norðanmönnum  gekk erfiðlega að saxa á forskotið gegn sterki vörn HK-liðsins sem hélt Akureyringum í hæfilegri fjarlægð. Það dró til tíðinda á 47 mínútu leiksins er Daníel Berg Grétarsson hjá HK fékk beint rautt spjald, er hann virtist taka um höfuð Heimis Arnar Árnasonar fyrirliða Akureyrar þegar hann reyndi að brjótast í gegnum varnarmúr gestanna. Allt ætlaði um koll að keyra en Heimir var allt annað en sáttur.

Akureyringar gáfust ekki upp og minnkuðu muninn niður í þrjú mörk, 22-25, þegar átta mínútur voru til leiksloka. HK lenti í brottrekstra vandræðum og Sigurjón Friðbjörn Björnsson fékk að líta fjögurra mínútna brottvísun fyrir að stoppa hraðaaupphlaup heimamanna er hann togaði Heimi Örn niður. Meðbyrinn var með norðanmönnum þessar mínútur sem minnkuðu muninn í eitt mark, 24-25 og jöfnuðu í 25-25 þegar tvær mínúr voru eftir.

HK komst í 26-25 þegar rúmlega mínúta var eftir. Akureyri klúðraði næstu sókn og HK hefði getað klárað leikinn í þeirri næstu. Sveinbjörn Pétursson í marki norðanmanna varði hins vegar skot Villhelms Gauta Bergsveinssonar og Akureyringar héldu í sókn og freistuðu þess að jafna. Heimamenn misstu hins vegar boltann klaufalega frá sér og Bjarki Már Elísson skoraði 27 mark HK yfir endilangan völlinn, en Sveinbjörn markvörður var þá lagður af stað í sóknina.

Lokatölur, 27-25, og dýrmæt stig í hús hjá HK en eflaust svekkja Akureyringar sig yfir því að fá ekkert út úr leiknum.

Mörk Akureyrar: Bjarni Fritzson 9 (3), Geir Guðmundsson 4,  Guðmundur Hólmar Helgason 3, Hörður Fannar Sigþórsson 3, Bergvin Gíslason 1, Oddur Gretarsson 2, Heimir Örn Árnason 2,  Daníel Einarsson 1.
Varin skot: Sveinbjörn Pétursson 19 (1).

Mörk HK: Bjarki Már Elísson 5 (1), Ólafur Bjarki Ragnarsson 5 (2), Tandri Már Konráðsson 5, Vilhelm Gauti Bergsveinsson 4, , Sigurjón Friðbjörn Björnsson 3, Daníel Berg Grétarsson 3 (1), Atli Ævar Ingólfsson 1, Bjarki Már Gunnarsson 1.
Varin skot: Björn Ingi Friðþjófsson 9.

Myndir: Sævar Geir Sigurjónsson

Mynd: Sport.is

Íslandsmeistarar FH unnu í kvöld góðan sigur á Aftureldingu á heimavelli sínum, Kaplakrika, þegar að N1-deild karla hófst aftur eftir EM fríið. Sigurinn var þó síður en svo auðveldur þar sem gestirnir úr Mosfellsbæ gáfu Íslandsmeisturunum ekkert eftir og voru skrefinu á undan lengi vel í leiknum. Á endanum sigu FH-ingar þó fram úr gestunum og unnu fjögurra marka sigur, 24-20.

FH 24-20 Afturelding (10-11)

Allt var í járnum í fyrri hálfleiknum og til marks um það má nefna að jafnt var á öllum tölum út allan fyrri hálfleikinn. Gestirnir úr Mosfellsbæ voru þó alltaf skrefinu á undan og höfðu raunar getað náð að auka forystuna í tvö mörk í nokkur skipti en Daníel Freyr Andrésson, markvörður FH bjargaði sínu liði vel og varði ní skot í fyrri hálfleik. Munurinn var svo eitt mark, Aftureldingu í vil, þegar að flautað var til leikhlés, staðan 10-11 fyrir gestina.

Afturelding náði svo loksins tveggja marka forystu þegar að þrjár mínútur voru liðnar af síðari hálfleik, þeir hefðu svo getað aukið muninn enn frekar en aftur reyndist Daníel Freyr, markvörður liðsins, þeim dýrmætur en óhætt er að segja að hann hafi á köflum haldið FH inn í leiknum. FH-ingar létu það þó ekki slá sig út af laginu að lenda undir og náðu fljótlega að jafna á nýjan leik. Þegar að tíu mínútur voru eftir af leiknum höfðu heimamenn í FH náð þriggja marka forystu og allt stefndi í sigur FH-inga. Vörn FH-inga var hrokkin í gang og að lokum vann liðið góðan 4 marka sigur, 24-20.

Örn Ingi Bjarkason var atkvæðamestur í liði FH með 6 mörk en hjá Aftureldingu gerði jón Andri Helgason 7 mörk. Daníel Freyr Andrésson í marki FH var besti maður vallarins í kvöld og varði ein 20 skot. Þá var kollegi hans í marki Aftureldingar, Davíð Svansson, einnig öflugur og varði 11 bolta.

Tölfræðin:

Mörk FH: Örn Ingi Bjarkason 6, Sigurður Ágústsson 5, Hjalti Þór Pálmason 5, Ólafur Gústafsson 3, Baldvin Þorsteinsson 2, Þorkell Magnússon 2, Halldór Guðjónssn 1.
Varin skot: Daníel Freyr Andrésson 25.

Mörk Aftureldingar:  Jón Andri Helgason 7, Jóhann Jóhannsson 5, Helgi Héðinsson 4, Sverrir Hermannsson 2, Pétur Júníusson 1, Böðvar Páll Ásgeirsson 1.
Varin skot: Davíð Svansson 15.

Mynd: Hilmar Þór

Fram hafði í kvöld betur gegn Gróttu 23-21 í N1-deild karla í handknattleik, en sigurinn var hvorki sannfærandi né sérlega áferðarfallegur.  Grótta hafði tveggja marka forystu í hálfleik 10-8 og gerði heimamönnum lífið leitt með þrotlausri baráttu og dugnaði.

Fram 23-21 Grótta (8-10)

Leikur Fram og Gróttu í Safamýrinni fer seint í sögubækur sem leiftrandi skemmtilegur handboltaleikur.  Hans verður verður hugsanlega getið fyrir hið gagnstæða.  Það var í rauninni afskaplega fátt að frétta.  Það má eiginlega segja að tilkoma Daða Hafþórssonar á leikmannalista Fram í kvöld hafi vakið meiri hrifningu heldur en það sem leikmenn höfðu upp á að bjóða eftir að flautað hafði verið til leiks.  Framarar söknuðu Ingimundar Ingimundarsonar og Róberts Arons Hostert, sem hafa bæst á sjúkralistann, en varla er hægt að skrifa byrjendabraginn á frammistöðu liðsins á fjarveru þessara manna þótt góðir séu.  Framarar byrjuðu  betur í kvöld, náðu fljótlega tveggja marka forystu og virtust ætla að hrista sig saman á tiltölulega skömmum tíma.  Mörkin komu úr ýmsum áttum, vörnin virkaði nokkuð stöndug og Magnús varði ljómandi vel í markinu.  Gróttumenn áttu í hinum stökustu vandræðum með að skora, virkuðu á köflum ráðleysislegir í sókninni og varnarleikurinn þeirra var hálfgerður hrærigrautur.  Tveir þeirra fengu tveggja mínútna brottvísanir með stuttu  millibili þegar um tíu mínútur voru liðnar af leiknum, Framarar náðu ekki að nýta það sem skildi og þegar Seltirningar voru fullmannaðir á ný létu þeir meira og meira að sér kveða.  Sóknarleikurinn var ekkert til að hrópa húrra fyrir, harla tilviljanakenndur og jafnvel máttleysislegur, en einhvern veginn tókst þeim þó að hnoða inn mörkum og saxa á forskot Fram.  Framarar komust í 7-4, en þá datt á einhver tíðindaminnsti kaflinn í sögu Framhússins, a.m.k. hvað heimamenn varðar.  Heimamenn lentu í alls kyns vandræðum með árásargjarna en villta vörn Gróttu, Lárus varði það sem lak í gegn og heimamenn skoruðu ekki nema eitt mark á síðustu sextán mínútum fyrri hálfleiks.  Grótta jafnaði metin eftir tæplega sautján mínútna leik og komst yfir skömmu síðar.  Það var í rauninni furðulegt, og kannski svolítið lærdómsríkt, að horfa á það sem fram fór á parketinu í Safamýri.  Þótt sóknarleikur Gróttumanna veðri seint gefinn út sem kennsluefni skilaði hann sínu og Seltirningar höfðu tveggja marka forystu þegar flautað var til hálfleiks, 10-8.

Gróttumenn héldu í horfinu framan af síðari hálfleik, án þess þó að sýna einhverja takta sem gefa tilefni til bikarahillusmíði.  Varnarleikurinn var, þrátt fyrir ákveðið reiðuleysi, nógu trylltur til að valda Frömurum þrotlitlum vandræðum og heimamenn gerðu sér reyndar erfitt fyrir sjálfir með döpru skotvali og almennu óðagoti.  Það hefði hins vegar verið nánast ómögulegt, nema þá í hliðrænni tilveru, að þeir héldu slíkum leik til streitu allt til loka.  Sebastian Alexandersson leysti Magnús af í  markinu strax í upphafi síðari hálfleiks, varði nokkra dýrmæta bolta og Fram náði forystunni eftir rúmlega þrettán mínútna leik, 14-13.  Gróttumenn gáfu sitt hins vegar ekki eftir, fóru fetið á einstaklingsframtakinu frekar en vel útfærðum sóknarleik og nýttu sér glufur í taktlausri Framvörninni.  Síðustu fimmtán mínútur leiksins hækkuðu skemmtanagildið til muna og forðuðu viðstöddum frá því að missa trúna á íþróttaguðinn.  Gæðin ruku svo sem ekki upp úr öllu valdi, en spenna og tilfinningar gerðu leikinn skemmtilegri.  Þórir Finnbogason sveif inn úr horninu þegar tæpar fimm mínútur voru til leiksloka og jafnaði metin fyrir Gróttu, 19-19, og aftur jöfnuðu gestirnir metin þegar þrjár mínútur voru eftir, 20-20.  Hákon Stefánsson því að vera stiginn upp úr meiðslum með því að skora 21.mark Fram og þar með var björninn unninn.  Fram fagnaði að lokum tveggja marka sigri, 23-21, en hann var hvorki sannfærandi né fagur.

Framarar hljóta að vera sullandi óánægðir með frammistöðuna í kvöld, hún var á löngum köflum á mörkum þess að vera boðleg.  Varnarleikurinn, sem á upphafsmínútunum virtist ætla að vera í ágætu lagi, var ósannfærandi og hefði ekki komið til fínn leikur Stefáns Baldvins og landskunnar leifturhreyfingar Sigurðar Eggertssonar hefði nánast mátt loka sjoppunni.  Sebastian lagði þung lóð á vogarskálarnar í síðari hálfleik, varði ágætlega og öskraði sína menn áfram.  Gróttumenn fóru langt á baráttu, tiltrú og góðri markvörslu Lárusar.  Þeir virka á köflum kaótískir, jafnvel svo að stefnir í vandræði, en einstaklingsframtakið skilaði dýrmætum mörkum.

Mörk Fram: Stefán Baldvin Stefánsson 5, Sigurður Eggertsson 4, Einar Rafn Eiðsson 4 (1 víti), Sigfús Páll Sigfússon 2, Halldór Jóhann Sigfússon 2, Jóhann Karl Reynisson 2, Jón Arnar Jónsson 2, Ægir Hrafn Jónsson 1, Hákon Stefánsson 1.
Varin skot: Magnús Gunnar Erlendsson 8, Sebastian Alexandersson 8.
Mörk Gróttu: Árni Ben Árnason 4, Þorgrímur Smári Ólafsson 4, Þráinn Orri Jónsson 3, Þórir Jökull Finnbogason 2, Ágúst Birgisson 1, Davíð Hlöðversson 1, Benedikt Reynir Kristinsson 1, Ólafur Ægir Ólafsson 1 (1 víti).
Varin skot: Lárus Helgi Ólafsson 14 (1 víti).

Myndir: Hilmar Þór.

Mynd: Nordic Photos

Handknattleiksmaðurinn Kiril Lazarov, sem var markahæsti maðurinn á nýafstöðnu Evrópumeistaramóti og þjálfari hans í Atletico Madrid, goðsögnin, Talant Dujshebaev eru hugsanlega á förum frá spænska stórliðinu eftir þetta tímabil. Sögusagnir eru um að þeir muni báðir ganga til liðs við Þýskalandsmeistara HSV Hamburg, en þetta kemur fram í fjölmiðlum í landi Lazarovs, Makedóníu.

Fyrir ekki löngu síðan rak HSV Hamburg, þjálfarann, Per Carlén og aðstoðarþjálfari Hamburgar mun stýra liðinu út þessa leiktíð. Fyrir tímabilið fékk Hamburg Per Carlén í þjálafarastöðuna og tók hann son sinn með sér, hægri skyttuna, Oscar Carlen, sem hefur verið meiddur allt tímabilið.

Tengdar fréttir:
Handbolti | Kiril Lazarov heldur á brott, en enginn veit hvert

Mynd: Hilmar Þór

N1-deild karla í handknattleik hefst á ný í kvöld eftir langt jóla-og EM frí. Heil umferð verður á dagskrá þar sem hæst ber að nefna viðureign Vals og Hauka í Vodafonehöllinni og Akureyri og HK fyrir norðan. Einnig mætast í kvöld Fram og Grótta í Framhúsinu og FH og Afturelding í Kaplakrika.

Sport.is heyrði í þjálfurum og fyrirliðum liðanna átta í deildinni og spurði út í stöðu mála fyrir seinni hluta mótsins.

Gunnar Berg Viktorsson aðstoðarþjálfari | Haukar | 1. sæti
„Við erum í fínum málum eins og er en þurfum samt að hafa fyrir þessu og við gefum okkur ekkert fyrirfram. Við eigum tvo mjög erfiða leiki framundan gegn Val og FH í næstu tveimur leikjum og staðan gæti kannski farið að skýrast betur eftir þá leiki. Staðan á okkar leikmannahópi er ágæt. Heimir Óli Heimisson hefur verið að glíma við meiðsli en hann er að braggast gæti farið að detta inn bráðlega.“

Einar Andri Einarsson þjálfari | FH | 2. sæti
„Staðan hjá okkur er nokkuð góð. Við erum í fínum málum í deildinni og erum búnir að æfa vel í fríinu og reyna að bæta ýmsa þætti í okkar leik. Við erum einnig búnir að keppast við að koma leikmönnum í gott stand sem hafa verið meiddir og það hefur gengið vel. Ragnar Jóhannsson verður eitthvað lengur frá en hann er samt farinn að æfa á ný. Aðrir eru klárir í slaginn.“

Kristinn Guðmundsson þjálfari | HK | 3. sæti
„Menn eru í misgóðu ástandi hjá okkur eftir fríið. Ólafur Víðir (Ólafsson) er meiddur og nokkrir leikmenn tæpir fyrir leikinn í kvöld gegn Akureyri. Við erum hins vegar ágætlega mannaðir en erum að fara í gríðarlega erfiðan leik fyrir norðan. Við gerum okkur alveg grein fyrir því að þetta verður mjög erfið og jöfn barátta um sæti í úrslitkeppninni og eflaust ræðst þetta ekkert fyrr en á lokasprettinum. Við ætlum hins vegar að leggja allt í sölurnar.“

Halldór Jóhann Sigfússon fyrirliði | Fram | 4. sæti
„Við erum búnir að æfa mjög vel í fríinu og komum vonandi endurnærðir í átökin. Við erum þokkalega bjartsýnir á framhaldið enda þýðir ekkert annað en að hafa trú á því sem maður er að gera ef hlutirnir eiga að ganga upp. Við ætlum okkur að vera á meðal fjögurra efstu liða í vor en vitum að þetta verður alveg hníjafnt. Staðan á leikmannahópnum er þannig að Diddi (Ingimundur Ingimundarson) kom meiddur til baka frá landsliðinu og verður væntanlega ekki með fyrstu leikina. Ég er sjálfur fyrst núna farinn að geta eitthvað af viti eftir meiðsli. Annars eru menn í þokkalegu standi en samt hnökrar hér og þar eins og gengur og gerist.“

Mynd: Snorri Sturluson

Atli Hilmarsson þjálfari | Akureyri | 5. sæti
„Við vorum á góðri siglingu fyrir áramót og verðum að halda því áfram. Menn eru orðnir þyrstir í að spila aftur og koma vonandi rétt stemmdir til leiks á ný. Leikmannahópurinn er svolítið laskaður. Heimir Örn Árnason og Guðlaugur Arnarsson eru tæpir vegna meiðsla en spila þó líklega í kvöld. Einnig eru Ásgeir Jónsson og Heiðar Þór Aðalsteinsson að jafna sig á meiðslum og því nokkur óvissa í leikmannahópnum eins og er.“

Óskar Bjarni Óskarsson þjálfari | Valur | 6. sæti
„Fyrst og fremst er gaman að byrja aftur eftir þetta langa hlé. Við þurfum klárlega að bæta okkar leik ef við ætlum okkur í úrslitakeppnina í vor. Við tökum hins vegar bara eitt skref í einu og þurfum að vinna í öllum okkar þáttum, hvort sem er vörn, sókn eða markvarsla. Valdimar Fannar (Þórsson) er skárri núna en hann var fyrir áramót en þó ekki hundrað prósent heill. Annars eru staðan á leikmannahópnum nokkuð góð.“

Reynir Þór Reynisson þjálfari | Afturelding | 7. sæti
„Við erum nokkuð brattir hérna í Mosfellsbænum. Ég tel okkur hafa nýtt fríið mjög vel og ég er búinn að vera ánægður með mína leikmenn á æfingum. Ég er því nokkuð bjartsýnn fyrir seinni hluta tímabilsins. Það eru allir heilir fyrir utan Þránd Gíslason. Hann fékk væga heilahimnubólgu og hefur ekkert æft og framhaldið hjá honum í óvissu.“

Mynd: Eyjólfur Garðarsson

Guðfinnur Arnar Kristmansson þjálfari | Grótta | 8. sæti
„Við erum búnir nota fríið í að æfa vel enda ýmislegt sem við höfum þurft að huga að. Seinni helmingurinn á mótinu leggst bara vel í okkur og við ætlum okkur að uppskera meira heldur en fyrir áramót. Jóhann Gísli Jóhannesson puttabrotnaði fyrir áramót og verður eitthvað frá. Að öðru leyti er leikmannahópurinn í góðu standi.“

N1-deild karla | Handknattleikur
Kl. 19:00 Akureyri-HK | Íþróttahöllin Akureyri
Kl. 19:30 Fram-Grótta | Framhús
Kl. 19:30 FH-Afturelding | Kaplakrika
Kl. 19:30 Valur-Haukar | Vodafonehöllin

Mynd: Eyjólfur Garðarsson

Neðsta lið N1-deildar karla, Grótta fékk einn leikmann til sín í félagsskiptaglugganum sem lokaði á miðnætti í gærkvöld. Sá leikmaður heitir Óttar Steingrímsson og hefur spilað með Fjölni undanfarið, en liðið er í neðsta sætinu í 1. deildinni.

Óttar er vinstri skytta, en sárlega hefur vantað upp á skot fyrir utan hjá Gróttu það sem af er vetri og ætti Óttar því að reynast Gróttu góður liðsstyrkur.

Óttar, sem er uppalinn í ÍBV er fæddur árið 1988 og var hann langmarkahæsti leikmaður Fjölnis á síðustu leiktíð með 102 mörk í tuttugu leikjum.

Grótta mætir Fram á útivelli á morgun og verður Óttar að öllum líkindum í leikmannahóp liðsins.

N1-deild karla hefst á morgun með fjórum leikjum sem sjá má hér að neðan.

kl. 19.00 Akureyri – HK | Höllin Ak.
kl. 19.30 Fram – Grótta | Framhús
kl. 19.30 FH – Afturelding | Kaplakriki
kl. 19.30 Valur – Haukar | Vodafonehöllin

Mynd: Sport.is

Félagsskiptaglugga Handknattleikssambands Íslands var lokað á miðnætti í gærkvöldi og var nokkuð um hreyfingar fyrir lokun. FH-ingar lánuðu markvörðinn Sigurð Örn Arnarson til toppliðs ÍR í 1.deildinni en Sigurður hefur lítið fengið að spreyta sig milli stanganna hjá FH það sem af er vetri.

Sigurður, sem er uppalinn hjá FH, gekk til liðs við uppeldisfélag sitt að nýju fyrir þessa leiktíð eftir að hafa leikið um skeið með Fram. Hann hefur, eins og áður kom fram, lítið fengið að spreyta sig í marki FH það sem af er vetri, þar sem Daníel Andrésson hefur farið mikinn og Pálmar Pétursson setið á bekknum.  Því komust FH og Sigurður að samkomulagi um að hann yrði lánaður til ÍR í 1. deildinni, þar sem Bjarki Sigurðsson er við stjórnvölinn.

Hjá ÍR, sem hefur fjögurra stiga forystu á ÍBV á toppi 1.deildar, hittir Sigurður fyrir tvö markverði; Kristófer Hrannar Guðmundsson og Andreas Örn Aðalsteinsson.

Þessi vistaskipti gleðja væntanlega knattspyrnuspekinginn Hjörvar Hafliðason, sem fyrri skemmstu tjáði sig um bekkjarsetu Sigurðs við heimasíðu FH, fh.is: “Stjáni Ara þarf að fara leyfa Sigga rakara að spila aðeins meira þarna í markinu og skandall að hann sé þriðji markvörður. Ef hann fer ekki að spila meira í janúar þá fer ég með hann í annað lið.”

Mynd: fram.is

Félagsskiptaglugginn í íslenska boltanum lokaði á miðnætti í gærkvöldi en nokkuð var um hreyfingar á honum. Framarar kræktu í tvo leikmenn frá Stjörnuni sem munu styrkja þá fyrir komandi átök en N1-deild karla hefst að nýju á morgun er heil umferð fer fram.

Framar fengu tvo leikmenn til liðs við sig en um er að ræða Hákon Stefánsson og Jón Arnar Jónsson. Hákon er öllum hnútum kunnugur hjá Fram enda lék með liðinu á síðustu leiktíð ásamt bróður sínum Magnúsi Stefánssyni sem einnig yfirgaf Fram eftir síðasta tímabil. Hann hélt til Vestmannaeyja og samdi við ÍBV en Hákon gekk til liðs við Stjörnuna. Hákon sem er fæddur árið 1988 getur bæði spilað í stöðu vinstri skyttu og leikstjórnanda.

Jón Arnar Jónsson, sem alla tíð hefur leikið með Stjörnunni, er vinstri hornamaður sem getur einnig leyst stöðu vinstri skyttu. Jón, sem er er fæddur árið 1990, æfði með Frömurum í landsliðspásunni og hefur nú skrifað undir samning við Safamýrarliðið sem gildir út þessa leiktíð.

Eins og áður segir hefst N1-deild karla á morgun eftir landsleikjapásuna en leiki morgundagsins má sjá hér að neðan.

kl. 19.00 Akureyri – HK | Höllin Ak.
kl. 19.30 Fram – Grótta | Framhús
kl. 19.30 FH – Afturelding | Kaplakriki
kl. 19.30 Valur – Haukar | Vodafonehöllin

Fredrik Petersen

Eins og kom fram á Sport.is í dag er danska handknattleiksstórliðið í Danmörku, AG Köbenhavn, búið að finna eftirmann Guðjóns Vals Sigurðssonar sem yfirgefur AGK eftir þessa leiktíð. Fredrik Petersen sænski vinstri hornamaðurinn sem hefur leikið með BSV síðustu tvö tímabil mun leysa Guðjón af en AGK kynnti hann til leiks á blaðamannafundi í dag.

Fredrik Petersen var í engum vafa um að hann vildi ganga til liðs AGK og þess vegna leyfðu forráðarmenn BSV honum að fara. Ekki einungis út af því heldur einnig vegna háar fjárhæðar sem Silkeborg fékk fyrir sænska landsliðsmanninn.

“Fredrik er með klásúlu í samningi sínum sem gaf okkur tækifæri á því að selja hann. Við höfum selt hann fyrir hátt verð, miðað við hornamann, sem eru yfirleitt ekki eins dýrir og skyttur. Við fengum engu að síður háa upphæð fyrir Fredrik,” sagði framkvæmdastjóri BSV Frank Lajer.

Lajer segir að tími Fredrik hjá BSV hafi verið ánægjulegur og að leikmanninum hafi ávallt liðið vel hjá félaginu. Þá segir hann að félagið sé komið langt á leið að finna arftaka Fredrik, vinstri hornamann sem gengur til liðs við BSV eftir þessa leiktíð.

Mynd: Nordic Photos

Skartgripasalinn, Jesper Nielsen, eigandi danska handknattleiksstórliðsins, AG Köbvenhavn var ekki lengi að festa kaup á vinstri hornamanni, sem kemur til með að leysa Guðjón Val Sigurðsson af hjá AGK á næsta tímabili. Guðjón Valur hefur sterklega verið orðaður við Kiel í Þýskalandi að undanförnu.

AG Köbenhavn hefur keypt Fredrik Petersen sem er sænskur landsliðsmaður og spilar stöðu vinstri hornamanns. Hann var með sænska landsliðinu á EM í Serbíu, en gat ekki spilað alla leikina vegna meiðsla. Hann var einn af betri leikmönnum dönsku deildarinnar síðasta tímabil.

“Ég var ekki í eina sekúndu um vafa um hvort ég færi í AG Köbenhavn, sem er stærsta félagsliðið í Skandinavíu, sem allir vilja spila fyrir,” sagði Svíinn á blaðamannafundi AGK í dag þar sem hann undirritaði samning sem tekur gildi eftir þetta tímabil og gildir næstu þrjú tímabilin eftir það.

Þjálfari AGK er einnig ánægður.

“Fredrik er í heimsklassa og hefur sannað það í dönsku deildinni og með sænska landsliðinu. Ég held að hann muni passa vel inn í leik okkar og er mjög ánægður með þessa lausn,” sagði landi Fredriks, þjálfari AGK, Magnus Andersson.

Ragnar Snær Njálsson í leik með Bad Neustadt.

Ekkert verður af því að skyttan Ragnar Snær Njálsson leiki með liði Akureyrar í N1-deild karla í handknattleik seinni hluta tímabilsins eins og til stóð. Ragnar hefur glímt við meiðsli í töluverðan tíma og er batinn hægari en hann vonaðist til. Ragnar lék með HSC Bad Neustadt í 3. deildinni í Þýskalandi sl. vetur en hefur ekkert spilað handbolta síðan í vor. Hann er laus allra mála hjá þýska liðinu og stefndi á að hjálpa norðanliðinu eftir áramótin.

„Ég verð bara að vera skynsamur og hugsa um sjálfan mig. Ég er ekki orðinn nægilega góður ennþá og vil frekar byrja aftur þegar ég er orðinn alveg hundrað prósent heill,“ sagði Ragnar í samtali við Sport.is í morgun. Hann segir þetta mikil vonbrigði, enda hafi hann hlakkað mikið til að spila með sínu heimaliði. Ragnar er Akureyringur í húð og hár og lék með KA á sínum tíma, en lék síðast hér á landi með liði HK.

„Þetta er alveg hrikalega svekkjandi en það er skynsamlegra að hugsa fram í tímann. Ef ég fer of snemma af stað og þá gæti þetta komið í bakið mér,“ segir hann. Ragnar, sem er 25 ára, hefur lengi glímt við hnémeiðsli og farið í nokkra aðgerðir sökum þess. Ofan á það fékk hann brjósklos í janúar í fyrra og spilaði þjáður síðustu leikina með Bad Neustadt. Hann segist stefna á að komast aftur út í atvinnumennskuna sem fyrst, en á allt eins von á að taka hálft til eitt tímabil hér heima áður.

„Ég stekk kannski ekki strax út og þarf hugsanlega að sanna mig hér heima upp á nýtt. Akureyri er eina liðið sem kemur til greina hjá mér hérna á Íslandi og það getur vel farið svo og að ég spili með þeim næsta vetur,“ segir Ragnar við Sport.is.

Mynd: Hilmar Þór

Fram vann í kvöld mikilvægan útisigur á HK í N1-deild kvenna en leikið var í Digranesi. Fram þurfti að hafa mikið fyrir sigrinum en liðið var undir mestallan síðari hálfleikinn. Með sigrinum jafnaði Fram Val að stigum á toppi deildarinnar.

HK 20-23 Fram (12-11)

Gestirnir úr Fram byrjuðu leikinn talsvert betur í kvöld, skoruðu fyrsta markið, og höfðu fljótlega náð fjögurra marka forystu. Framstúlkur héldu forystu sinni nánast allan fyrri hálfleikinn en HK-ingar unnu sig inn í leikinn eftir því sem á leið og náðu á endanum að jafna leikinn undir lok hálfleiksins í stöðunni 11-11. Þær gerðu svo gott betur en það og náðu forystunni áður en hálfleiksflautan gall. Staðan í hálfleik því 12-11 heimastúlkum í vil.

Jafnræði var á með liðunum í upphafi síðari hálfleiks. HK náði fljótlega tveggja marka forystu en Fram jafnaði um hæl. HK liðið, sem almennt er talið veikara á blaði heldur en Framliðið, var þó skrefinu á undan fyrstu 20 mínúturnar. Markvörður liðsins, Ólöf Kolbrún Ragnarsdóttir, var vel á verðinum í markinu og fór langt með að skila HK stúlkum dýrmætum sigri. Framliðið er ekki þekkt fyrir það að gefast upp og jafnaði leikinn þegar að einungis um átta mínútur voru eftir af leiknum og því útlit fyrir spennandi lokamínútur. Þegar að ein og hálf mínúta var svo til stefnu höfðu gestirnir í Fram ná tveggja marka forystu, það reyndist nóg og Fram vann að lokum dýrmætan þriggja marka sigur, 20-23.

Stella Sigurðardóttir var atkvæðamest í liði Fram með níu mörk en hjá HK skoraði Brynja Magnúsdóttir fimm mörk. Marverðir liðanna, þær Guðrún Ósk Maríasdóttir í Fram og Ólöf Kolbrún Ragnarsdóttir í HK stóðu sig báðar með prýði og voru báðar 18 skot.

Mynd: Hilmar Þór

Fyrirliði íslenska landsliðsins í handbolta, Guðjón Valur Sigurðsson, gæti gengið til liðs við þýska stórliðið Kiel eftir núverandi leiktímabil. Guðjón er samningsbundinn dönsku risunum í AG Kaupmannahöfn en talið er að hann gæti verið á förum frá þeim, þó aldrei fyrr en í sumar. Guðjón gekk til liðs við AGK síðastliðið vor, ásamt Ólafi Stefánssyni. Þar leika einnig Arnór Atlason og Snorri Steinn Guðjónsson.

Ef Guðjón gengur til liðs við Kiel mun hann hitta þar fyrir tvo Íslendinga. Fyrrum þjálfara sinn, Alfreð Gíslason og miðjumanninn Aron Pálmarsson. Þetta er ekki í fyrsta skipti sem að Guðjón spilar með Íslendingum í Evrópu en áður en hann gekk til liðs við AGK var hann hjá Rhein Neckar Löwen, þar sem Guðmundur Guðmundsson er við stjórnvölin og margir Íslendingar hafa leikið.

Guðjón er 32 ára gamall. Hann hóf atvinnumannaferil sinn árið 2001. Þá gekk hann til liðs við Tusem Essen í Þýskalandi frá KA á Akureyri. Guðjón hefur leikið með þremur liðum í Þýskalandi á sínum ferli: Essen, Gummersbach og Rhein Neckar Löwen. Ef hann gengur til liðs við Kiel verður það fjórða þýska liðið sem hann spilar með á sínum ferli.

Mynd: Nordic Photos

Pascal Hens, landsliðsmaður Þýskalands í handknattleik, hefur gefið út að hann sé hættur að leika með landsliðinu eftir að ljóst varð að liðið ætti ekki möguleika á að komast á Ólympíuleikana sem haldnir verða í Lundúnum í sumar. Hens, sem er 31 árs gamall leikmaður HSV Hamburg, ætlar nú eingöngu að einbeita sér að spila með félagsliði sínu.

“Eftir 11 ár í handbolta án pásu, með félagsliði og landsliði, hef ég ákveðið að gefa líkama mínum hvíld þegar landsliðspásurnar koma. Ég verð bráðlega 32. ára og ég mun einbeita mér á fullu að Hamburg núna og mun reyna að spila þar í nokkur ár til viðbótar. Þess vegna hef ég ekkert annað val,” sagði Hens.

Hens, sem leikur í stöðu vinstri skyttu, á að baki 199 landsleiki fyrir Þýskaland og hefur skorað í þeim 565 mörk. Hann varð Evrópumeistari með þýska liðinu árið 2004 og sama ár fékk hann silfur á Ólympíuleikunum í Aþenu. Þá varð hann heimsmeistari með liðinu á heimavelli árið 2007.

Mynd: Hilmar Þór

Íslenska landsliðið í handknattleik leikur í 3.riðli undankeppni Ólympíuleikanna í London í sumar og mætir þar Króötum, Japönum og Sílebúum.  Þetta varð ljóst eftir að Danir tryggðu sér Evrópumeistaratitilinn í Belgrad í dag, en úrslit Evrópumótsins réðu niðurröðun liðanna í riðla undankeppni ÓL.  Leikirnir þrír fara fram í Zagreb í Króatíu dagana 6.-8.apríl næstkomandi.

Hefðu Serbar orðið Evrópumeistarar í dag hefðu liðin raðað sér á allt annan hátt í riðla undankeppninnar og Ísland hefði þá þurft að glíma við Spán, Slóveníu og Brasilíu.  Raðað er í riðlana eftir árangri á heimsmeistaramóti, Evrópumóti, Ameríkumóti, Asíumóti og Afríkumóti.  Sex lið tryggja sér keppnisrétt í gegnum árangur á heimsmeistaramóti, þ.á.m. Ísland, tvö í gegnum Evrópumótið, tvö í gegnum Ameríkumótið og eitt lið bæði úr Asíu- og Afríkumóti.

1.riðill, leikið í Madrid á Spáni:
Spánn, Pólland, Serbía, Alsír.

2.riðill, leikið í Gautaborg í Svíþjóð:
Svíþjóð, Ungverjaland, Brasilía, Makedónía.

3.riðill, leikið í Zagreb í Króatíu:
Króatía, Ísland, Japan, Síle.

Leikirnir fara allir fram dagana 6.-8.apríl.

Leikirnir í þessari undankeppni HM fara fram annað hvort 9. eða 10.júní á Íslandi og helgina eftir, 16. eða 17.júní, í Hollandi.  Sigurliðið tryggir sér sæti á HM á Spáni og meta verður möguleika íslenska liðsins dágóða.

Leikir HM-undankeppninnar eru þessir:
Litháen – Pólland
Rússland – Tékkland
Slóvenía – Portúgal
Slóvakía – Hvíta-Rússland
Makedónía – Austurríki
Ungverjaland – Noregur
ÍSLAND – Holland
Þýskaland – Bosnía & Herzegóvína
Svíþjóð – Svartfjalland

Liðunum var raðað í þrjá styrkleikaflokka.  Sjö efstu liðin á EM í Serbíu voru í styrkleikaflokki 1, liðin í sætum 13 til 16 á EM í styrkleikaflokki 2 og sjö sigurvegarar riðlakeppni undankeppni HM í styrkleikaflokki 3.  Byrjað var á því að færa liðin úr styrkleikaflokki 2 yfir í hina flokkana tvo, liðin tvö sem dregin voru fyrst fóru í styrkleikaflokk 1 og síðari liðin tvö í styrkleikaflokk 3.  Þá stóðu tveir styrkleikaflokkar eftir og voru liðin dregin saman, lið úr styrkleikaflokki 1 á undan.
Ísland átti sæti í styrkleikaflokki 1 og þegar nafn þess kom upp úr pottunum voru þrír mögulegir mótherjar eftir; Hollendingar, Bosníumenn og Svartfellingar.

Mynd: Eyjólfur Garðarsson

Íslandsmeistarar Vals eru komnir í toppsætið á ný í N1-deild kvenna í handknattleik eftir níu marka sigur gegn Stjörnunni í Vodafonehöllinni í dag, 24-15. Valur hafði tveggja marka forystu í hálfleik, 9-7. Heimastúlkur skoruðu fyrstu fjögur mörkin í seinni hálfleik sem lagði grunninn að sigrinum.

Valur er komið með sextán stig í efsta sæti deildarinnar, tveimur stigum meira en Fram sem á leik til góða á þriðjudaginn gegn HK. Stjarnan hefur tíu stig í fimmta sæti.

Mörk Vals: Hrafnhildur Ósk Skúladóttir 7 (2), Dagný Skúladóttir 5, Anna Úrsúla Guðmundsdóttir 4, Karólína Bærhenz Gunnarsdóttir 4, Arndís María Erlingsdóttir 2, Þorgerður Anna Atladóttir 1, Kristín Guðmundsdóttir 1.
Varin skot: Guðný Jenný Ásmundsdóttir 19, Sunneva Einarsdóttir 5 (1)

Mörk Stjörnunnar: Sólveig Lára Kjærnested 5, Hildur Harðardóttir 3, Þórhildur Gunnarsdóttir 2 (1), Esther Viktoría Ragnarsdóttir 2, Sandra Sif Sigurjónsdóttir 1, Helena Rut Örvarsdóttir 1, Hanna Guðrún Stefánsdóttir 1.
Varin skot: Kristín Ósk Sævarsdóttir 18.

Mynd: Nordic Photos

Norðmaðurinn Tor Lian, sem verið hefur forseti Handknattleikssambands Evrópu, EHF, síðan 2004 tilkynnti á stjórnarfundi í Belgrad í dag að hann myndi ekki sækjast eftir endurkjöri á aðalfundi í Mónakó í júní.  Varaforseti sambandsins, Jean Brihault, býður sig hins vegar fram til forseta.

Lian settist eins og áður segir í forsetastólinn árið 2004, en hann hafði þá gegnt embætti varaforseta sambandsins og var einn þeirra sem komu að stofnun sambandsins árið 1991.  Eftir að Lian tilkynnti á stjórnarfundinum í dag að hann myndi ekki sækjast eftir endurkjöri voru honum færðar þakkir framkvæmdastjórnar fyrir vel unnin störf, ekki síst fyrir að auka veg handboltaíþróttarinnar í Evrópu í forsetatíð sinni.

“‘Ég hef notið tímans sem ég hef starfað fyrir EFH, ekki síst tímans sem ég hef verið forseti,” sagði Lian m.a. á stjórnarfundinum í dag.  “Við höfum afrekað ótrúlega hluti á þessum tíma.  Ég þakka framkvæmdastjórninni hlý orð í minn garð og lýsi yfir stuðningi mínum við framboð Jean Brihault.  Hann hefur verið einn af lykilmönnum framkvæmdastjórnar EHF um árabil og er rétti maðurinn til að leiða sambandið á komandi árum.”  

Mynd: Eyjólfur Garðarsson

„Þetta kom skemmtilega á óvart,“ segir Dagný Skúladóttir handknattleikskona í liði Vals í samtali við Sport.is, en hún var í dag valin besti leikmaður N1-deildar kvenna í umferðum 1-9. Dagný hefur verið mikilvægur hlekkur í sterku liði Vals það sem af er tímabils. Hún hefur skorað grimmt úr horni sem og hraðaupphlaupum og einnig verið sterk í vörninni.

„Þetta er mikil viðurkenning fyrir mig og sérstaklega í ljósi þess að ég er nýlega komin til baka eftir hlé,“ sagði Dagný. Hún tók fram skóna að nýju fyrir um ári síðan eftir að hafa tekið sér frí vegna barneigna.

„Ég er með mjög sterkum leikmönnum í liði og auk þess hafa leikmenn úr öðrum liðum verið að spila vel í vetur. Þannig að ég er hæstánægð með þetta.“

Um deildina sjálfa segir hún ánægjulegt hvað önnur lið hafa bætt sig mikið og það sé gott fyrir íslenskan kvennahandbolta.

„Ég er alveg sjá 5-6 lið sem geta verið að taka stig hvert af öðru og það er enn skemmtilegra fyrir deildina. Valur og Fram hafa náttúrulega borið höfuð og herðar yfir önnur lið sl. ár en núna eru t.d. Stjarnan, HK og ÍBV líkleg til þess að blanda sér í baráttuna,“ segir Dagný. Valur er núverandi Íslandsmeistari og er einnig komið áfram í bikarnum eftir sigur gegn Fram í átta liða úrslitum. Tólf ár eru síðan Valur varð síðast bikarmeistari en það var árið 2000.

„Við ætlum klárlega að taka alla titla sem eru í boði og það er komin tími á bikartitil. Við erum búin að ryðja Fram úr vegi sem er gott. Ég tek það hins vegar skýrt fram að það er ekkert í hendi ennþá,“ segir hún. Dagný er 31 árs og verður samningslaus eftir tímabilið. Hún segir óvíst hvað hún muni gera þegar samningur hennar við Val rennur út.

„Ég ætla bara að sjá til hvað ég geri í vor. Ég ætla allavega ekki að vera með neinar yfirlýsingar,” segir hún að lokum.

Lið umferða 1-9 í N1 deild kvenna:

Markvörður | Guðný Jenný Ásmundsdóttir | Valur
Jenný hefur verið jafnbesti markvörður deildarinnar í vetur og vinnur vel með sterkri vörn Valsliðsins sem fengið hefur á sig fæst mörk allra liða í deildinni.

Línumaður | Anna Úrsúla Guðmundsdóttir | Valur
Anna Úrsúla hefur verið í hópi bestu leikmanna deildarinnar um árabil, er öflug bæði í vörn og sókn og drífur félaga sína áfram með leikgleði og baráttuanda.

Vinstra horn og besti leikmaður umferða 1-9 | Dagný Skúladóttir | Valur
Dagný er mikilvægur hlekkur í sterku liði Vals, er öflugur horna- og hraðaupphlaupsmaður og er sterk og sívinnandi í vörninni. Framlag Dagnýjar er Valsliðinu mikilvægt í sókn að titlum, en hún hefur farið mikinn á báðum endum vallarins auk þess sem dugnaður hennar og elja smita út frá sér og skila því sem til þarf til að komast yfir erfiða hjalla.

Hægra horn | Sólveig Lára Kjærnested | Stjarnan
Sólveig Lára hefur sýnt gamalkunna takta í vetur, er öflugur og áræðinn leikmaður sem heggur á hnúta þegar á þarf að halda og er gríðarlega mikilvægur hlekkur í liði Stjörnunnar.

Vinstri skytta | Stella Sigurðardóttir | Fram
Stella hefur brugðist við aukinni ábyrgð í liði Fram af miklum myndarskap, er orðinn ein öflugasta skyttan í deildinni og lætur auk þess hressilega til sín taka í vörninni.

Hægri skytta | Birna Berg Haraldsdóttir | Fram
Hin stórefnilega Birna Berg hefur sýnt það og sannað í vetur að hrósyrði í hennar garð eru fyllilega verðskulduð, öflug skytta sem axlar ábyrgð og dregur vagninn ef með þarf.

Miðjumaður | Ester Óskarsdóttir | ÍBV
Ester hefur stýrt sóknarleik Eyjaliðsins af miklu öryggi í vetur og er orðinn heilsteyptur og stórgóður leikmaður sem lætur að sér kveða á báðum endum vallarins.

Þjálfari | Einar Jónsson | Fram
Framstúlkur hafa unnið sjö deildarleiki í röð undir stjórn Einars, sem fyrir löngu hefur sannað sig sem einn færasti handboltaþjálfari landsins.

Mynd: Heimasíða Odder

Hornamaðurinn Andri Snær Stefánsson er genginn til liðs við Akureyri í N1-deild karla frá danska félaginu Odder þar sem hann hefur leikið undanfarið eitt og hálft ár.

Andri, sem er 26 ára gamall, ætti að vera norðanmönnum kunnugur enda á hann að baki 99 leiki fyrir félagið þar sem hann lék fyrstu fjögur árin frá stofnun þess árið 2006. Hann var kosinn besti leikmaður liðsins árin 2007 og 2008.

Hann mun eflaust reynast Akureyringum talsverður liðsstyrkur en mikil meiðslavandræði hafa verið hjá félaginu fyrri hluta tímabils þar sem lykilmenn á borð við Heimi Örn Árnason og Hörð Fannar Sigþórsson hafa verið frá.

Mynd: Hilmar Þór

Einar Andri Einarsson, annar þjálfari FH, er fullur tilhlökkunar fyrir bikarleikinn gegn Haukum í undanúrslitum Eimskipsbikar karla í handknattleik. „Eflaust verður hátíð í Hafnarfirði þessa viku og þetta verður bara frábær skemmtun,“ sagði Einar Andri í samtali við Sport.is, en liðin mætast tvisvar í sömu vikunni, í deild og bikar, um miðjan febrúar.

„Kannski voru einhverjir farnir að hugsa lengra og vildu fá þetta sem úrslitaleik en það er alltaf gaman og mikil stemmning þegar þessi lið mætast. Þetta verður eflaust stál í stál og allt brjálað á Ásvöllum. “

FH mátti sætta sig við fimm marka tap gegn liði Hauka á heimavelli í deildinni, 16-21, í síðasta leiknum fyrir hlé í desember en liðin munu mætast á Schenkerhöllinni í bikarnum.

„Við erum búnir að vinna í okkar málum eftir það tap og mætum klárir í bikarleikinn. Við ætlum okkur að klára þetta verkefni og förum fullir sjálfstraust í leikinn,“ sagði Einar við Sport.is.

Mynd: Hilmar Þór

Haukar og FH mætast í Hafnarfjarðarslag í undanúrslitum Eimskipsbikar karla í handknattleik eins og við greindum frá fyrr í dag. Liðin munu mætast tvisvar sinnum á Ásvöllum með skömmu millibili í febrúar. Sport.is heyrði hljóðið í Aroni Kristjánssyni, þjálfara Hauka, eftir bikardráttinn í dag.

„Fyrsta óskin var að fá heimaleik og það gekk upp. Það lítur út fyrir mikla veislu á Ásvöllum þessa vikuna þar sem liðin mætast þar tvisvar á stuttum tíma,” sagði Aron.

„Þetta verður spennandi verkefni og getur farið á hvorn veginn sem er. Bæði liðin eru að berjast á toppnum í deildinni og gengi okkar hefur kannski komið meira á óvart. Við ætlum að selja okkur dýrt í leiknum og fara yfir þessa hindrun,“ sagði hann.

Mynd: Sport.is

Það verður stórslagur í undanúrslitum Eimskipsbikarsins í handknattleik en Haukar taka á móti FH í undanúrslitum en í hinum leiknum heimsækja leikmenn Fram Digranesið og etja kappi við HK. Það þarf ekki að fara mörgum orðum um slagi Hafnarfjarðarliðanna en jafnan eru troðfullir áhorfendapallar á þessum leikjum og allt á suðupunkti.

Hjá konunum tekur Valur á móti Stjörnunni en FH-ingar leika gegn ÍBV í Vestmannaeyjum. Undanúrslitaleikirnir fara fram miðvikudaginn 8. febrúar hjá konunum en hjá körlum er leikið mánudaginn 13. febrúar.

Besti leikmaður heims árið 2011

Opnað hefur verið fyrir kosningu á netinu þar sem almenningur getur kosið besta leikmann heims árið 2011. Kosningin opnaði í gær og hægt er að kjósa þann sem sér þykir bestur með því að smella hér. Þrír af þeim fimm sem tilnefndir eru hafa áður verið leikmenn ársins af Alþjóðahandknattleikssambandinu, IHF. Þá vekur athygli að þrír Frakkar eru tilnefndir.

Luc Abalo (Frakklandi)
Fæddur: 6. september 1984, Félag: Atletico Madrid (SPÁ), Staða: Hægra horn

Mikkel Hansen (Danmörku)
Fæddur: 22. október 1987, Félag AG Köbenhavn (DAN), Staða: Vinsri skytta

Thierry Omeyer (Frakklandi)
Fæddur: 2. nóvember 1976, Félag : THW Kiel (ÞÝS), Staða: Markvörður
Besti leikmaður ársins af IHF 2008

Filip Jicha (Tékklandi)
Fæddur:  19.4.1982, Félag : THW Kiel (ÞÝS), Staða: Vinstri skytta
Besti leikmaður ársins af IHF 2010

Nikola Karabatic (Frakklandi)
Fæddur: 11.4.1984, Félag : Montpellier HB (FRA), Staða: Vinstri skytta
Besti leikmaður ársins af IHF 2007

Fyrrverandi bestu leikmenn ársins í vali IHF:

2010: Filip Jicha (Tékklandi)
2009: Slawomir Szmal (Póllandi)
2008 : Thierry Omeyer (Frakklandi)
2007 : Nikola Karabatic (Frakklandi)
2006 : Ivano Balic (Króatíu)
2005 : Arpad Sterbik (Serbíu)
2004: Henning Fritz (Þýskalandi)
2003: Ivano Balic (Króatíu)
2002: Bertrand Gille (Frakklandi)
2001 : Kyung Shin-Yoon (Kóreu)
2000: Dragan Skrbic (Serbíu)
1999: Rafael Guijosa (Spain)
1998: Daniel Stephan (Þýskalandi)
1997: Stephane Stoecklin (Frakklandi)
1996: Talant Dushebajew (Spain)
1995: Jackson Richardson (Frakklandi)
1994: Talant Dushebajew (Rússlandi)
1990: Magnus Wislander (Svíþjóð)
1989: Kang Jae-Won (Kóreu)
1988: Veselin Vujovic (Júgóslavíu)

Mynd: Heimasíða Víkings

Félagsskiptaglugginn er opinn hér á landi og hefur verið það frá 7. janúar og verður opinn til og með 31. janúar. Hér neðst má sjá þau félagsskipti í N1-deild karla sem staðfest hafa verið af skrifstofu HSÍ.

Framarar endurheimta markvörðinn Björn Viðar Björnsson, en hann hefur verið á láni hjá Stjörnunni í 1. deildinni, sama gera Haukar en þeir endurheimta markvörðuinn Stefán Huldar Stefánsson, sem hefur verið á láni hjá Víkingi.

Daníel Hansson, sem ekki hefur komið við sögu hjá FH í einum leik, það sem af er tímabili heldur til Færeyja, í besta liðið þar, Neistann, þar sem hann hittir bróðir sinn, vinstri skyttuna, Finn Hansson, sem er færeyskur ríkisborgari og er í færeyska landsliðinu.

Þá endurheimtir Valur línumanninn sterka Hjálmar Þór Arnarson, sem er upalinn hjá Víkingi. Grótta, sem er í fallsæti í N1-deildinni hefur nú enn þynnri hóp en ella, en liðið mátti ekki beint við því í þeirri baráttu sem það stendur í.

• Björn Viðar Björnsson, markvörður, til baka úr láni, frá Stjörnunni til Fram
• Stefán Huldar Stefánsson, markmaður, til baka úr láni, frá Víkingi til Hauka
• Daníel Hansson, hægri hornamaður, úr FH til Neistans í Færeyjum
• Hjálmar Þór Arnarson, línumaður, úr Gróttu í Víking, á láni frá Val.

Mynd: Snorri Sturluson

Valur er komið í undanúrslit Eimskipsbikars kvenna eftir sigur gegn Fram í kvöld. Fyrirfram mátti búast við hörkuleik enda hafa þessi lið háð harða baráttu um alla titla undanfarin ár og léku til að mynda til úrslita bæði bikarnum og N1-deildinni í fyrra. Svo fór að lokum að Valsstúlkur unnu góðan þriggja marka sigur, 24-21. Þá komust FH og Stjarnan einnig í undanúrslit.

Valur 24-21 Fram (12-8)

Valur byrjaði leikinn talsvert betur í kvöld og skoraði fyrstu sex mörk leiksins. Óhætt er að segja að það hafi lagt grunninn að sigri Vals því þrátt fyrir ágæta spretti Framliðsins náðu þær bláklæddu aldrei að ógna sigri Vals að neinu viti. Staðan í hálfleik var 12-8 fyrir Val.

Framarar sýndu klærnar í síðari hálfleik og náði liðið að minnka mun Valsara í tvö mörk. Lengra komust Framstúlkur þó ekki, Valsstúlkur unnu leikinn 24-21 og því ljóst að nýjir bikarmeistarar verða krýndir í vor þar sem Fram hafði betur í fyrra.

Anna Úrsúla Guðmundsdóttir var markahæst í liði Vals með sjö mörk og þá skoraði Kristín Guðmundsdóttir 6 mörk. Hjá Fram var Stella Sigurðardóttir markahæst með níu mörk. Markverðir liðanna, þær Guðný Jenný Ásmundsdóttir hjá Val og Guðrún Ósk Maríasdóttir í Fram, áttu báðar fína leiki og vörðu sitthvor 13 skotin.

Í hinum leikjum kvöldsins komust FH og Stjarnan einnig í undanúrslit. FH hafði betur gegn Gróttu, 25-20 og Stjarnan vann góðan sigur á HK, 25-22. Áður hafði ÍBV tryggt sér sæti í undanúrslitunum með stórsigri á Selfossi.

Það eru því FH, ÍBV, Stjarnan og Valur sem eru í pottinum þegar dregið verður í undanúrslitin í hádeginu á morgun.

Myndir: Eyjólfur Garðarsson

Mynd: Snorri Sturluson

Stórleikur fer fram í kvöld í 8-liða úrslitum Eimskipsbikar kvenna í handknattleik er Valur og Fram mætast í Vodafonehöllinni. Þessi tvö sterkustu kvennalið landsins hafa mæst í úrslitaleik keppninnar undanfarin ár, en Fram hefur orðið bikarmeistari sl. tvö ár. Valur hefur hins vegar ekki unnið bikartitil síðan árið 2000, eða í tólf ár.

Einnig mætast í kvöld HK og Stjarnan í Digranesi og FH og Grótta í Kaplakrika. ÍBV er þegar komið í undanúrslit eftir stórsigur gegn Selfossi, 37-20, í síðustu viku.

Eimskipsbikar kvenna | Handknattleikur
Kl. 19:30 | FH-Grótta | Kaplakrika
Kl. 19:30 | HK-Stjarnan | Digranes
Kl. 19:30 | Valur–Fram | Vodafonehöllin

Daninn Mikkel Hansen kemur til greina sem handknattleiksmaður ársins 2011. Mynd: Nordic Photos

Alþjóða handknattleikssambandið hefur gefið út hvaða fimm leikmenn koma til greina sem handknattleiksmaður ársins 2011. Þrír af þessum fimm koma frá Frakklandi, þeir Luc Abalo, Thierry Omeyer og Nikola Karabatic. Einnig eru tilnefndir þeir Mikkel Hansen frá Danmörku og Filip Jicha frá Tékklandi, en Jicha var valinn bestur í fyrra.

Þrír hópar standa að valinu; útvaldir handknattleiksspekingar, útvaldir fjölmiðlar og einnig getur almenningur kosið á heimasíðu alþjóða handknattleikssambandsins, www.ihf.info.

Mynd: Fram.is

Ungverska handknattleikskonan Anett Köbli, sem lék með Íslandsmeisturum Vals í handknattleik kvenna á síðustu leiktíð, er gengin til liðs við Fram á nýjan leik, en þaðan kom hún einmitt til Vals á sínum tíma.  Félagaskiptin hafa verið staðfest á skrifstofu HSÍ og Köbli verður því gjaldgeng með Fram í bikarleiknum gegn Val annað kvöld.

Anett Köbli er 31 árs, getur leikið bæði sem skytta og leikjstórnandi og er ágætur varnarmaður.  Hún lék ekki eins mikið með Val og vonir stóðu til, einkum vegna þrálátra meiðsla, en styrkir leikmannahóp Fram og þekkir hverja fjöl í Framhúsinu.  Köbli er eins og áður segir orðin gjaldgeng með Fram þar sem félagaskiptin hafa verið færð til bókar hjá HSÍ og getur því leikið með Safamýrarliðinu þegar það heimsækir Val í stórleik umferðarinnar í Eimskipabikar kvenna annað kvöld,

Mynd: Nordic Photos

Markamaskínan makedóníska, Kiril Lazarov er ekki einungis heitt nafn á EM – því stjörnuleikmaðurinn er það einnig á slúðurlistanum.

Hinn 31. árs gamli örvhenti leikmaður spilar með þreföldum sigurvegurum Meistaradeildar Evrópu, Atletico Madrid, sem hét áður Ciudad Real.

Ljóst er að Lazarov mun yfirgefa Atletico Madrid eftir yfirstandandi tímabil, en í hvaða lið hann mun fara er óljóst.

“Kiril Lazarov fer mjög leynt með þetta og hefur ekki sagt neitt við neinn um þetta í búningsklefanum,” sagði hæsti leikmaður EM, danska stórskyttan Nikolaj Markussen, sem er samherji Lazarov í Atletico.

Flestir telja að Lazarov muni ganga til liðs við ungverska stórliðið Veszprém, sem hann lék með frá árinu 2002 til ársins 2007 og muni þar leysa Marko Vujin af, sem gengur til liðs við Kiel eftir þessa leiktíð, en Vujin er hægri skytta eins og Lazarov og er í eldlínunni með heimamönnum í Serbíu á EM þessa dagana.

Ljóst er að Lazarov mun yfirgefa Atletico eftir þessa leiktíð en í hvaða lið hann mun fara verður tíminn einn að leiða í ljós. Forráðarmenn Atletico Madrid þurfa ekki að óttast þess að finna ekki eftirmann Lazarovs því liðið hefur þegar samið við franska landsliðsmanninn Xavier Barachet, sem mun ganga til liðs við Atletico eftir þessa leiktíð frá Chambéry og fylla í skarð Lazarovs.

Mynd: Hilmar Þór

Íslandsmeistarar Vals lögðu KA/Þór örugglega að velli í dag, 30-19, er liðin áttust við í Vodafonehöllinni í N1-deild kvenna í handknattleik. Valur var níu mörkum yfir í hálfleik, 18-9, og sigurinn aldrei í hættu. Karólína Bærhenz Lárusdóttir var markahæst í liði Vals með átta mörk og Ragnhildur Rósa Guðmundsdóttir skoraði sjö mörk. Hjá KA/Þór var Ásdís Sigurðardóttir atkvæðamest með átta mörk skoruð.

Með sigrinum fer Valur upp að hlið Fram á toppi deildarinnar en bæði lið hafa 14 stig eftir átta leiki. KA/Þór er hins vegar áfram á botninum með tvö stig.

Mynd: Montpellier

Túnis sigraði Alsír í úrslitaleik Afríkukeppninnari handknattleik, sem staðið hefur yfir síðustu 10 dagana. Þar með er Túnis með þáttökurétt á Ólympíuleikunum í London, sem fara fram á þessu ári.

Afríkupennin fór fram í Marokkó og lauk í fyrradag er Túnis sigraði Alsír, nokkuð sannfærandi, 23-20. Alsír mun því fara í forkeppni ÓL eins og Ísland. Þá mun Egyptaland sem hafnaði í 3. sæti mótsins einnig fara í undankeppni ÓL því liðið sigraði heimamenn í Marokkó, 29-15. Öll þrjú liðin sem lentu í þremur efstu sætunum hafa tryggt sér inn á HM á Spáni 2013.

Þrír þekktustu og bestu leikmenn Túnisbúa eru Heykel Megannem, sem leikur með St. Raphail sem mætti FH í EHF keppninni á dögunum, Issam Tej, línumaðurinn öflugi og miðjumaðurinn knái Wissem Hmam, sem leika báðir með franska stórliðinu Montpellier.

Hér að neðan má sjá tilfrið úr leiknum:

Mynd: Sport.is

Framarar hafa orðið  fyrir miklu áfalli fyrir komandi átök í N1-deild kvenna en ljóst er að meiðsli Birnu Berg Haraldsdóttur munu halda henni frá keppni fram að næstu áramótum. Birna meiddist í leik gegn Val á dögunum og þótti strax ljóst að um alvarleg meiðsli hafi verið að ræða. Nú er svo ljóst að Birna er með slitið krossband, skaddað liðband og rifinn liðþófa og gæti því verið frá keppni í heilt ár.

Birna hefur einnig gert það gott í knattspyrnunni undanfarin ár þar sem hún hefur fest sig í sessi sem einn efnilegasti markvörður landsins. Hún er uppalin hjá FH en lék síðasta sumar á láni hjá ÍBV. Hún átti ennþá eftir að gera upp hug sinn hvort hún myndi leika með FH næsta sumar eða taka annað ár í vestmannaeyjum. Nú er þó ljóst að hún mun ekki spila knattspyrnu í sumar.

„Fremra krossbandið er slitið, auk þess sem liðbandið er ekki eins og það á að vera og rifa er í liðþófanum. Ég er því ekkert að fara að spila íþróttir á næstunni. Sjúkraþjálfarinn minn segir að ég geti reiknað með því að vera að snúa til baka um áramótin, en ef allt gengur vel á næstunni þá kemst ég í aðgerð um miðjan febrúar og þá stefni ég að því að ná mér eitthvað fyrr, „ sagði Birna þegar að Sport.is náði tali af henni.

Eins og áður sagði meiddist Birna þegar að lið hennar, Fram, keppti við Val fyrr í mánuðinum. Þá fékk Birna slæmt högg á hnéð og var strax ljóst að um alvarleg meiðsli væri að ræða en Birna yfirgaf íþróttahúsið með sjúkrabíl. „Ég var að hoppa upp í loftið og það er ýtt á mig svo ég missi jafnvægið og dett. Ég lendi frekar skakkt með allan þungan á hnénu. Ég fann það strax að eitthvað mikið væri að.“

Birna segir að þrátt fyrir áfallið sé hún ekki af baki dottinn og bætir við að hún ætli sér að koma sterk til baka, enda ung að árum og á nóg eftir. „Það þýðir ekkert annað en að reyna að vera jákvæð. Ég var alveg ónýt til að byrja með eftir að ég fékk fréttirnar. Það þýðir samt ekkert að leggja árar í bát, þetta er bara annað verkefni sem þarf að leysa og ég ætla að koma sterkari til baka,“ sagði Birna Berg Haraldsdóttir að lokum við Sport.is.

Mynd: Youtube

Af skiljanlegum ástæðum vita ef til vill ekki margir að Afríkukeppnin í handknattleik stendur nú sem hæst, enda beinist athyglin í miklum mæli að Evrópumótinu í Serbíu.

Afríkukeppnin stendur engu að síður sem hæst í Morókko og Alsír er búið að tryggja sér sæti í úrslitum og í kvöld kemur í ljós hvort það verða heimamenn í Morókko eða Túnis sem þeir mæta í úrslitaleiknum. Sigurvegarar Afríkukeppninnar vinna sér inn þátttökurétt á Ólympíuleikunum í London síðar á þessu ári. Þá fá þrjár efstu þjóðirnir þátttökurétt á HM á Spáni 2013.

Í dag fór fram fyrri undanúrslitaleikur mótsins, eins og áður hefur komið fram. Leikurinn sem var á milli Alsír og Egyptalands var sannkallaður reifari. Egyptar leiddu með einu marki, 25-24 er fjörtíu sekúndur lifðu eftir leik og vitust að minnsta kosti öruggir með annað stigið. Annað kom þó á daginn því Alsír jafnaði metin þegar tuttugu sekúndur voru eftir, 25-25. Egyptar geysast þá upp völlinn til þess að reyna landa sigri, boltinn fór fram yfir miðjuna og leikurinn virtist vera að fjara út. Egyptarnir hlupu eins og fætur toguðu til þess að sækja boltann og taka miðju. Hana tóku þeir þegar níu sekúndur lifðu eftir leik, en misstu boltann í hendur leikmanns Alsír þegar fimm sekúndur voru eftir. Hann var fljótur að gefa á samherja sinn sem var kominn fram á vallarhelming andstæðinganna og honum tókst að skora sigurmarkið rétt í þann mund sem flautan gall.

Slíkur endir á leik hefur ekki sést oft en umræddur leikur minnir ef til vill á leik Íslands og Austuríkis á EM 2010 þegar Ísland glataði niður þriggja marka forystu á rúmum 30 sekúndum.

Myndband af þessum ótrúlega endi má sjá hér að neðan:

Þess ber að geta að Túnis sigraði Marokkó 28-16 og mætir Alsír í úrslitaleik mótsins á morgun.

Mynd: Nordic Photos

Leikmaður Granita í Litháen tryggði liði sínu sigur í deildinni heima fyrir, með vítakasti sem líkist nokkuð víti Havard Tvedten, nema leikmaðurinn snýr boltanum þó ekki framhjá markverðinum með skoti aftur fyrir bak heldur klobbar hann markmanninn með skoti aftur fyrir bak.

Stáltaugar í þessu víti því þetta tryggði liði leikmannsins eins marks, 25-24 sigur.

Mynd: Eyjólfur Garðarsson

Grótta lagði KA/Þór með eins marks mun, 26-25, í hörkuleik í KA-heimilinu fyrir norðan í dag í uppgjöri botnliðanna í N1-deild kvenna í handknattleik. Leikurinn var hníjafn nánast frá upphafi til enda. Sunna María Einarsdóttir skoraði 26 mark Gróttu rúmri mínútu fyrir leikslok og það reyndist sigurmark leiksins. Grótta fer með sigrinum uppfyrir KA/Þór og hefur þrjú stig í sjöunda til áttunda sæti, líkt og FH, en KA/Þór situr á botninum með tvö stig.

KA/Þór 25-26 Grótta (13-12)

Leikur liðanna var hníjafn allan fyrri hálfleikinn og liðin skiptust á að hafa forystu. Staðan um miðjan hálfleikinn var jöfn, 6-6. KA/Þór komst í 10-8 þegar sjö mínútur voru til leikhlés og hefði getað aukið muninn í þrjú mörk þegar tæp mínúta var til hlés. Heiða Ingólfsdóttir markvörður Gróttu varði hins vegar vítaskot Mörthu Hermannsdóttur og Grótta minnkaði muninn í kjölfarið niður í eitt mark. Staðan í leikhléi 13-12, KA/Þór í vil.

Norðanstúlkur byrjuðu seinni hálfleikinn vel og náðu þriggja marka forystu, 16-13. Grótta jafnaði metin í 17-17 og komst yfir, 18-17, þegar tíu mínútur voru búnar af síðari hálfleik og allt í járnum í KA-heimilinu. KA/Þór náði tveggja marka forystu, 21-19, þegar seinni hálfleikurinn var hálfnaður. Leikurinn var stál í stál næstu mínútur en Grótta jafnaði metin í 24-24 þegar sléttar fimm mínútur voru til leiksloka.
Sunna María Einarsdóttir kom Gróttu yfir, 26-25, þegar rúmlega ein mínúta lifði leiks og KA/Þór tók leikhlé. Heiða Ingólfsdóttir varði skot frá Mörthu Hermannsdóttur í marki Gróttu þegar um hálf mínúta var eftir. Frida Petersen varði hinu megin í marki KA/Þórs. Norðanstúlkur héldu í sókn sem fjaraði út og aðeins aukakastið eftir, sem vörnin tók.

Lokatölur, 26-25, og mikilvæg stig í hús hjá Gróttu.

Mörk/KA/Þórs: Martha Hermannsdóttir 6 (1), Ásdís Sigurðardóttir 6, Kolbrún Gígja Einarsdóttir 5, Sunnefa Nílsdóttir 2, Jóhanna Snædal 2, Erla Heiður Tryggvadóttir 3 (1), Katrín Vilhjálmsdóttir 1.
Varin skot: Frida Petersen 16 (2).

Mörk Gróttu: Tinna Laxdal Gautadóttir 5 (1), Unnur Ómarsdóttir 5, Sunna María Einarsdóttir  4 (1), Laufey Ásta Guðmundsdóttir 2, Sóley Arnarsdóttir 2, Elín Helga Jónsdóttir 2, Björg Fenger 3.
Varin skot: Heiðar Ingólfsdóttir 15 (2).

Mynd: Hilmar Þór

Framstúlkur eru komnar á topp N1-deildar kvenna í handknattleik eftir sigur á Val í Safamýrinni í dag. Leikurinn var mikil skemmtun frá fyrstu mínútu, eins og venjan er þegar að þessi tvö lið mætast. Lokatölur í leiknum urðu 26-21 fyrir Fram sem vann þar langþráðan sigur á Val.

Fram 26-21 Valur (14-11)

Það var til mikils að vinna í Safamýrinni í dag enda liðin tvö jöfn að stigum á toppi deildarinnar.Framstúlkur byrjuðu leikinn betur á heimavelli sínum í dag, skoruðu fyrsta markið, og höfðu yfirhöndina allan fyrri hálfleikinn. Fyrir leikinn hafðiFram ekki sigrað Val í deildinni í hartnær tvö ár eða síðan á vormánuðum ársins 2010. Fram spilaði vel, bæði í vörn og sókn en Valsstúlkur voru þó aldrei langt á eftir og sýndu á köflum góða takta.Þegar að flautað var til hálfleiks voru heimastúlkur með þriggja marka forystu, staðan 14-11.

Snemma í síðari hálfleik urðu Framarar fyrir miklu áfalli þegar að Birna Berg Haraldsdóttir meiddist á hné og var borin útaf á sjúkrabörum. Atvikið leit illa út en vonandi fyrir Framara er ekki um slæm meiðsli að ræða. Hart var barist í síðari hálfleiknum og máttu greinilega sjá að bæði lið ætluðu sér sigur. Valsstúlkur náðu að jafna leikinn í stöðunni 16-16 en þá tóku Framarar aftur við sér og náðu þriggja marka forystu á ný. Valsstúlkur voru þó ekki á því að gefast upp og þegar að sjö mínútur voru eftir af leiknum var munurinn aðeins eitt mark og spennan í húsinu mikil. Þá var eins og allt loft færi úr Valsliðinu og Framstúlkur gengu á lagið. Eftir það var ekki spurning hvorum megin sigurinn myndi enda og langþráður sigur Fram á Val því staðreynd. Lokatölur 26-21

Tölfræðin:

Fram:
Varin skot: Guðrún Ósk Maríasdóttir 15

Mörk: Elísabet Gunnarsdóttir 9, Stella Sigurðardóttir 7, Ásta Birna Gunnarsdóttir 5, Sigurbjörg Jóhannsdóttir 2, Sunna Jónsdóttir 1, Guðrún Þóra Hálfdánsdóttir 1.

Valur:
Varin skot: Guðný Jenný Ásmundsdóttir 15, Sunneva Einarsdóttir 12

Mörk: Hrafnhildur Skúladóttir 5, Anna Úrsúla Guðmundsdóttir 2, Kristín Guðmundsdóttir 6, Ágústa Edda Björnsdóttir 3, Dagný Skúladóttir 1, Ragnhildur Rósa Guðmundsdóttir 2, Karólína B. Lárudóttir 1.

Mynd: Nordic Photos

Per Carlen, fyrrverandi þjálfari Þýskalandsmeistara Hamburgar, var sem kunnugt er látinn taka poka sinn á dögunum. Síðan þá hafa forráðarmenn Hamburg velt fyrir sér nýjum þjálfara.

Nú er það orðið ljóst að enginn þjálfari verður ráðinn í stað Carlen, heldur mun aðstoðarþjálfari liðsins, Jens Häusler stýra liðinu einn út þessa leiktíð. Martin Schwalb, sem gerði Hamburg að Þýskalandsmeisturum á síðustu leiktíð er nú framkvæmdarstjóri og forseti félagsins. Hann segir að hann treysti Häusler fullkomlega í það verkefni að stýra liðinu út þessa leiktíð. Eftir það mun hefjast leit að nýjum þjálfara.

HSV Hamburg er í 3. sæti þýsku Bundesligunnar á eftir Kiel og Füchse Berlin.

Mynd: Hilmar Þór

Landslið Íslands skipað leikmönnum 20 ára og yngri mætir A-landsliði Finna í dag klukkan 16:00 í Laugaradalshöllinni. Frítt er inn á leikinn, sem er liður landsliðsins í undirbúningi fyrir undankeppni EM.

Landsliðsþjálfarar eru Geir Sveinsson og Kristján Halldórsson. Mætum í höllina í dag og sjáum framtíðarlandsliðsmenn.

Landsliðið er skipað eftirtöldum leikmönnum:

Markmenn;
Einar Ólafur Vilmundarson, Haukar
Kristján Kristjánsson, Grótta

Aðrir leikmenn:
Agnar Smári Jónsson, Valur
Árni Benedikt Árnason, Grótta
Ásgeir Jóhann Kristinsson, Akureyri
Bjartur Guðmundsson, Valur
Böðvar Páll Ásgeirsson, Afturelding
Garðar Benidikt Sigurjónsson, Fram
Geir Guðmundsson, Akureyri
Guðmundur Hólmar Helgason, Akureyri
Ísak Rafnsson, FH
Jón Bjarki Oddsson, ÍR
Kristján Orri Jóhannsson, Grótta
Sveinn Aron Sveinsson, Valur
Víglundur Jarl Þórsson, Stjarnan
Þráinn Orri Jónsson, Grótta

Mynd: ASOBAL

Hinn eldfljóti leikmaður í Evrópu- Heimsmeistara- og Ólympíuliði Frakka, Luc Abalo er enginn venjulegur maður; hann er eflaust með besta úlnlið handboltaheimsins en hann sýndi það í seinni æfingaleiknum gegn Noregi sem fram fór í Frakklandi fyrir nokkrum dögum, þegar hann sneri boltanum á fáranlegan hátt framhjá markverði Norðmanna, Ole Erevik, en svona lagað á ekki að vera hægt – sjón er  sögu ríkari í myndbandi hér að neðan.

Í því má einnig sjá þegar Thierry Omeyer, markvörður Frakka sendir boltann 30 metra yfir völlinn í svokallað sirkus mark á Michael Guigou. Frakkar eru svo sannarlega heitir fyrir EM en þeim er spáð sigri á mótinu.