HSÍ hefur látið hanna og framleiða handboltasmáforrit eða „app“ fyrir snjallsíma.  Með þessu nýja appi má með einföldum og þægilegum hætti nálgast handboltatíðindi helstu fréttamiðla landsins, úrslit leikja og stöðu í deildum. Appið, sem fyrirtækið Stokkur á veg og vanda að, er fáanlegt bæði fyrir Android-síma og iPhone og er nú þegar komið á opna markaði snjallsímanotenda, Android Market og App Store.   Niðurhal er einfalt og fljótlegt og krefst lítillar sem engrar tæknikunnáttu.

Nýja handbolta-appið streymir handboltafréttir frá Morgunblaðinu, Vísi.is og Sport.is, en auk þess birtast þar úrslit leikja í N1-deild karla, N1-deild kvenna, 1.deild karla og Eimskips-bikarnum sem og staðan í þessum þremur deildum.  Úrslit og staða uppfærast hratt og örugglega.

Varla þarf að taka það fram að handbolta-appið er fríefni, notendur snjallsíma borga ekki sérstaklega fyrir niðurhal þess og notkun.

Hlekkur á forritið fyrir iOS.

Hlekkur fyrir forritið á Android.